Segundu Komandante PNTL Dili, Superintendente Polisia, Euclides Belo, hala’o konferénsia imprensa kona-ba kazu pesoál joven ida sona kanek ajente polísia ida iha área Comoro, Dili. Imajen Tatoli/Eugénio Pereira

DILI, 09 fevereiru 2021 (TATOLI)- Ajente polísia, Domingos Savio de Calau nia liman laran hosi sorin kuana naklees no ran sulin maka’as tanba derrepente de’it hetan sona hosi joven ida iha area Kampu Baru, Comoro, Munisípiu Dili, sesta loraik (05/02).

Insidente ne’e akontese bainhira autoridade polísia sira hamutuk ho ekipa Jestaun Merkadu Dili halo atuasaun ba negosiante ambulante sira ne’ebé kontra regra hodi fa’an modo, ai-fuan, ikan no seluk tan iha trotoar leten no okupa estrada públiku iha área Comoro Kampu Baru tuun to’o mai besik Rotunda estátua Prezidente Nicolau Lobato.

Notísia Relevante : Ema Sona Membru F-FDTL Na’in Ida iha Tasi-tolu

Segundu Komandante PNTL Dili, Superintendente Euclides Belo afirma PNTL lamenta ho krime ne’ebé halo hosi ema sivíl hasoru membru polísia sira.

Euclides konta, ekipa polísia asegura seguransa ba funsionáriu Jestaun Merkadu Dili halo operasaun no sosializa lei bandu negosiante sira fa’an sasán okupa estrada públiku hodi hamosu engarrafamentu.

Durante sosializa lei ne’e, derrepente karreta mikrolete ida tama saruntu ba estrada laran hodi hamosu problema haksesuk-malu entre kondutór no negosiante sira,  no parte PNTL mós halo atuasaun hodi tenta rezolve problema, maibé joven ida halo filmajen ba polísia nia atuasaun ne’e no parte polísia husu atu hamoos tiha vídeo ne’e, maibé joven ne’e lakohi hodi kontinua diskute malu, derrepente joven ne’e lori kapasete hodi baku hasoru ajente polísia ne’e no tebe dala rua to’o lori tudik ki’ik sona  kedas ba ajente polísia Domingos Savio de Calau no rezulta membru ne’e nia liman karuk kanek.

“Ita nia pesoál ajente polísia ne’e hetan baku uluk hosi joven ne’e lori kapasete no tebe tan membru no lori tan tudik sona kona membru polísia nia liman to’o kanek,” Euclides Belo informa ba jornalista iha Komandu PNTL, Dili, tersa ne’e.

Euclides husu ba pesoál joven ne’e labele lori kazu ne’e ba keixa fali iha Parlamentu Nasionál, tanba parte PNTL mós hein pesoál joven ne’e atu hato’o keixa ba parte PNTL Eskuadra Aimutin, Dili.

Euclides konsidera asaun tebe no hakanek ninia membru nu’udar krime, no parte PNTL sei la tolera kualkér ema sivíl no joven atu tula liman hasoru forsa PNTL no F-FDTL.

Parte PNTL Eskuadra Aimutin rasik to’o agora hein hela joven ne’e atu hato’o keixa ba polísia, karik nia sente la seguru, tanba bainhira joven ne’e la koopera PNTL sei implementa lei hodi detein joven ne’e.

Komandu PNTL Dili mós aprezenta ona kronolojia kazu ne’e ba Komandu Jerál PNTL hodi informa tutan ba Ministru Interiór, Taur Matan Ruak no Vise-Ministru Interiór, António Armindo.

Jornalista   : Eugénio Pereira

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here