Embaixadór Austrália iha Timor-Leste, Peter Roberts. Imajen TATOLI/Egas Cristovão

DILI, 09 fevereiru 2021 (TATOLI)–Governu Austrália liuhosi Embaixada Austrália iha Timor-Leste, prontu fornese vasina kombate COVID-19 ba populasaun iha Timor-Leste.

Embaixadór Austrália iha Timor-Leste, Peter Roberts, hateten vasina ne’e ninia prosesu hala’o liuhosi COVAX Facility, nune’e Ministériu Saúde no Organizasaun Mundiál Saúde serbisu hamutuk ho organizasaun ne’e.

“Austrália fó apoiu ba COVAX hodi fornese vasina ba populasaun 20% (iha faze rua), Austrália mós prontu atu fornese vasina ba populasaun hotu 80%, maibé faze ida mak sei vasina husi COVAX. Austrália prontu atu apoiu prosesu distribuisaun no monitorizasaun, tanba Embaixada hetan orsamentu foun atu ajuda prosesu vasina iha Timor-Leste hamutuk millaun AU$24 durante tinan tolu,” Embaixadór Peter Roberts relata hafoin ramata enkontru ho Primeiru-Ministru, Taur Matan Ruak, iha Palásiu Governu, tersa ne’e.

Notísia relevante: Armanda ho ekipa hahú prepara ba vasinasaun AstraZeneca

Iha enkontru ne’e, atualiza mós kona-ba kooperasaun entre Governu Austrália no Timor-Leste.

“Ami ko’alia kona-ba kooperasaun, tanba nasaun rua ne’e hanesan viziñu no parseiru importante tebes iha ámbitu luta kontra COVID-19. Tanba ne’e, ha’u ko’alia ho Primeiru-Ministru kona-ba Austrália no Timor-Leste nia kooperasaun iha área kombate COVID-19, partikulármente Austrália iha komprimísiu atu apoiu prosesu vasina iha Timor-Leste,” nia haktuir.

Antes ne’e, Komisaun Interministeriál ba asuntu vasinasaun lidera husi Vise-Primeira Ministra no Ministra Solidariedade Sosiál no Inkluzaun, Armanda Berta dos Santos, hahú halo preparasaun ba vasinasaun COVID-19 hanaran AstraZeneca.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here