Reitór UNTL, Joao Soares Martins. Imajen Tatoli/Egas Cristovão

DILI, 08 fevereiru 2021 (TATOLI)— Reitór Universidade Nasionál Timor Lorosa’e (UNTL), João Soares Martins konsidera polémika lista asesu ba UNTL no Institutu Politékniku Betano (IPB), kompeténsia iha Ministériu Ensinu Superiór Siénsia no Kultura (MESSK) no Komisaun Asesu Engressu Ensinu Superiór (KAEES).

João Soares Martins hato’o konsiderasaun ne’e hafoin lidera ekipa reitorál foun UNTL hasoru-malu ho Primeiru Ministru (PM), Taur Matan Ruak, iha Pálasiu Governu, segunda (08/02).

Notísia Relevante:Estudante 5.582 admitidu ba UNTL no IPB

“Ne’e kompeténsia Ministru Ensinu Superiór Siénsia no Kultura no Prezidente Komisaun Asesu Ensinu Superiór (KAEES) atuál Diretór Jerál Ensinu Superiór, tanba prosesu selesaun estudantes ba asesu UNTL liuhosi KAEES,”Líder másimu UNTL, ba jornalista sira.

Nia mós rekoñese katak, iha órgaun selesaun ne’e involve UNTL-nia ema na’in-rua, maibé Ministru tutela mak iha kompeténsia loloos atu hatán ba polémika kona-bá balun valór boot maibé naran la sai, no balun valór ki’ik mak naran sai.

Entretantu, estudante rejimi jerál no rejimi espesiál ne’ebé admitidu atu asesu ba Ensinu Superiór Públiku Universidade Nasionál Timor Lorosa’e (UNTL) no Institutu Politékniku Betano (IPB) ba tinan akadémiku 2021 hamutuk 5.582 no anunsia hosi Komisaun Asesu Enggresu Ensinu Superiór (KAEES) iha sesta (05/02).

Hafoin anunsia rezultadu, públiku preokupa kedan ho rezultadu ne’ebé  iha liuhosi média sosiál katak,  balun valór boot maibé naran la sai, no balun valór ki’ik mak naran sai.

Ohin mós Deputadu António da Conceição no David Dias Ximenes iha liuhosi plenária, husu Governu liuhosi MESSK atu halo klarifikasaun ba polémika iha prosesu selesaun ne’e.

Notísia Relevante:PN husu MESSK klarifika mekanizmu selesaun estudante foun ba UNTL

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here