Imajen ilustrasaun/Google

DILI, 08 fevereiru 2021 (TATOLI)- Ekipa Servisu Investigasaun Kriminál Polísia Munisipiu Lautem, halo hela investigasaun kle’an ba motivu hosi kazu ne’ebé deskonfia la’en oho feen iha Bairru Cicara, Aldeia Irauno, Suku Com, Postu Administrativu Lautem, Munisípiu Lautem.

Portavós Komandu Jerál Polísia Nasionál Timor-Leste (PNTL), Superintendente Xefe, Arnaldo de Araújo, relata kronolojia kazu omisídiu ne’e akontese iha loron 22 janeiru 2021, maibé to’o agora ninia prosesu investigasaun seidauk konklui tanba PNTL seidauk hatene motivu loloos suspeitu ho inisiál A hodi hakotu vítima Regina Mendes nia destinu.

Notísia Relevante : PNTL investiga ona kazu la’en taa feen to’o grave

Arnaldo de Araújo dehan, kazu ne’e sei kontrovérsia, tanba suspeitu informa ba polísia katak, vítima lori arma branka maka oho aan, maibé iha parte seluk vítima no suspeitu nia oan rasik ne’ebé sai sasin deklara ba polísia katak, nia aman nu’udar suspeitu maka oho mate nia inan hanesan vítima.

Portavós Komandu Jerál PNTL, Superintendente Xefe, Arnaldo de Araújo, segunda ne’e, informa ba jornalista iha Komandu Jerál PNTL, Dili, katak ekipa Polísia Servisu Investigasaun Kriminál Lautem sei kontinua halo identifikasaun iha fatin akontesimentu hodi rekolla nafatin dadus balun para bele aprezenta rezultadu investigasaun ba Ministériu Públiku hodi prosesa tuir lei.

Rejista kazu dezastre naturál tolu

Iha parte selu,k durante loron 29 janeiru, tinan ne’e, mosu asidente dezastre naturál anin-boot sobu uma iha Suku Irabin de Baixo, Postu Administrativu Uato-carbau no rezulta uma monu hanehan vítima na’in-rua, hanesan  feen-la’en sofre kanek grave.

Iha loron 3 fevereiru 2021, rejistu mós kazu anin no udan boot ne’ebé akontese iha Suku Fohorem, Postu Administrativu Fohorem-Covalima, estraga uma ida.

Ekipa Governu Timor-Leste mós rekolla ona dadus hodi fó apoiu ai-han no materiál konstrusaun ba vítima sira hodi hadi’a fila fali sira nia uma.

Iha parte seluk, PNTL Aileu mós sei kontinua investiga suspeitu ida ne’ebé sofre moras mentál sunu uma lisan ida iha Munisipiu Aileu, foin lalais ne’e.

 Jornalista  : Eugénio Pereira 

Editór        : Francisco Simões

HAKEREK NO HATÁN

Please enter your comment!
Please enter your name here