Primeiru Ministru (PM), Taur Matan Ruak simu audiénsia hosi Ministru Edukasaun Juventude no Desportu (MEJD), Armindo Maia. Imajen/Média GPM.

DILI, 08 fevereiru 2021 (TATOLI)—Primeiru Ministru (PM), Taur Matan Ruak orienta ona Ministru Edukasaun Juventude no Desportu (MEJD), Armindo Maia atu halo monitorizasaun ba prosesu ezekusaun Orsamentu Jerál Estadu (OJE) 2021 liuliu iha fundu infraestrutura.

Armindo Maia hato’o asuntu ne’e hafoin hala’o reuniaun ho Xefe Governu iha Palásiu Governu, Dili, segunda (08/02).

Notísia Relevante:MEJD sei reabilita edifísiu eskola 222 iha marsu

“Ita hetan alokasaun orsamentu liuhosi fundu infraestrutura iha 2021, millaun $30. Tanba ne’e, ha’u simu orientasaun hosi PM Taur atu halo mós akompañamentu no monitorizasaun ba prosesu ezekusaun,” Armindo Maia hateten ba jornalista sira.

Tuir Governante ne’e katak, orientasaun hosi Xefe Governu ne’e bazeia ba planu konstrusaun eskola hamutuk 222  ho sala-de-aula 6.000-resin, ne’ebé ninia prosesu balun la’o ona.

“Ita aprezenta ona dokumentu 29  ba Ministériu Obra Públika hodi hetan verifikasaun no eskola CAFE 5 mak hetan ona verifikasaun,” nia informa.

Ho orientasaun ne’e, Armindo konsidera katak, Xefe Governu fó duni atensaun ba ezekusaun fundu infraestrutura ne’e rasik nune’e bele hetan rezultadu ne’ebé di’ak molok mandatu remata.

Ministru ne’e mós fiar katak, MEJD iha orsamentu sufisiente atu aselera prosesu konstrusaun no reabilitasaun sala-de-aula ne’ebé ninia implemntasaun sei realiza iha marsu tinan ne’e, no  ninia prosesu depende ba verifikasaun hosi MOP.

Entretantu Orsamentu ne’ebé prevee ba MEJD hosi Orsamentu Jerál Estadu (OJE) 2021 hamutuk millaun $111.

Notísia Relevante:MEJD sei konstrui edifísiu eskola CAFE haat ho millaun $4

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here