Meza Parlamentu Nasionál baku-fila hafoin akontentese dezentendimentu entre deputadu sira. Imajen Tatoli/António Gonçalves

DILI, 08 fevereiru 2021 (TATOLI)-Relatóriu mundiál 2020 hosi democracy perception index (índise) hatudu Timor-Leste hetan ranking 44 hosi nasaun 167.

Diretór Ezekutivu Lalenok ba Ema Hotu (LABEH), Christopher Henry Samson, informa persesaun índise demokrasia mundiál ba tinan 2020 hatudu Timor-Leste iha inserteza nia laran.

“Tuir Índise Democracy 2020, Timor-Leste tun hosi pontu 41 sa’e ba pontu 44 hosi totál nasaun 167, signifika katak ita iha duni inserteza iha demokrasia no polítika,” Christopher Henry Samson, segunda ne’e, informa ba jornalista sira liuhosi konferénsia imprensa iha edifísiu LABEH, Comoro, Dili.

Notísia Relevante : TL ninia luta kontra korrupsaun hahú di’ak iha nivel globál

Nia esplika, tuir índise Democracy 2020 ida-ne’e haree ba oinsá Timor-Leste halo eleisaun nasionál livre no justu, seguransa ba votante influensia hosi rai li’ur, kapasidade funsionáriu públiku hodi implementa programa Governu no partisipasaun povu nian iha polítika iha duni ka lae.

“Maibé votu povu nian la utiliza tuir povu nia aspirasaun ho didi’ak  tanba  situasaun inserteza polítika iha ukun sai situasaun ida ne’e kontribui  lori Timor-Leste iha inserteza,” Christopher Henry Samson hateten.

Christopher Henry Samson, husu Estadu ho Governu atu servisu maka’as hodi Timor-Leste bele sai nafatin nasaun ne’ebé respeitu povu nia votu iha eleisaun no hili Timor-oan sira ne’ebé iha kapasidade atu implementa programa Governu.

Nia hatutan, tanba Governu determina tiha ona promove prosperidade povu tomak liuhosi Governu ida ne’ebé moos hodi hala’o ninia promesa kona-ba demokrasia, transparénsia, kontabilidade justisa  no ekonomia.

“LABEH fó nafatin korajen ba Governu hodi elimina disparidade ekonomia no kombate ki’ak no promove progresu sosiál no padraun moris ne’ebé di’ak liután ba povu no nasaun,”  Christopher  hateten.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here