Diretór Nasionál Formasaun no Treinamentu Agríkola, Ipolito da Costa. Imajen TATOLI/Natalino Costa

DILI, 08 fevereiru 2021 (TATOLI)—Kooperasaun entre Governu Timor-Leste liuhosi Ministériu Agrikultura no Peska (MAP) hamutuk Arava International  Center for Agriculture Training (AICAT) iha Israel, daudaun ne’e forma ona joven hamutuk na’in-225 iha área agrikultura.

 “Ita-nia kooperasaun ho Embaixada Israel iha Singapura, hahú iha tinan 2015 no momentu ne’ebá ita regulariza koopersaun ne’e hodi forma ita-nia joven sira. Joven sira ne’ebé graduadu ona husi eskola vokasionál no universidade fakuldade agrikultura to’o oras ne’e hamutuk 225 ona,” Diretór Nasionál Formasaun no Treinamentu Agríkola, Ipolito da Costa, informa ba Agência TATOLI, segunda ne’e, iha edifísiu MAP, Comoro.

Objetivu prinsipál husi kooperasaun ne’e maka joven sira bele aprende teknolojia no bainhira filafali mai Tmór bele kontribui ba Governu iha setór agrikultura.

“Ezemplu mak grupu ortikultura Seloi Kraik iha minisípiu Aileu, ne’ebé ninia jerente hanesan antigu alunu AICAT. Sira halo atividade hamutuk ho pareseiru ho inisiativa rasik no la hetan ajuda husi Governu, sira harii sentru  formasaun hodi fó formasaun ba joven sira relasiona ho tékniku ba agrikultór sira,” nia akresenta.

Aleinde ne’e, antigu alunu sira kuda produtu agríkola hodi fa’an ba supermerkadu sira iha Dili laran.

“Ida-ne’e maka ita-nia espetativa, katak Ministériu Agrikultura Peska kuandu iha oportunidade ba formasaun, bele fó oportunidade ba joven hodi aprende, nune’e  to’o tempu sira filafali mai bele halo netik buat ruma,” nia hatutan.

Tuir Diretór Ipolito da Costa, tinan  ida-ne’e ba oin kuandu iha inisiativa forma grupu sira, bele halo proposta hodi MAP bele ba haree fatin produsaun.

“Ami bele fasilita hodi submete ba diresaun seluk tanba tinan-rua tutuir malu sira iha ona asosiasaun antigu alunu AICAT, ne’ebé hahú serbisu ho ministériu. Espera tempu oin mai bele hare rezultadu serbisu,” nia tenik.

Jornalista: Natalino Costa

Editora: Julia Chatarina 

HAKEREK NO HATÁN

Please enter your comment!
Please enter your name here