Portavós Komandu Jerál Polísia Nasionál Timor-Leste (PNTL), Superintendente Xefe, Arnaldo de Araújo. Imajen Tatoli/Eugénio Pereira.

DILI, 08 fevereiru 2021 (TATOLI)- Durante loron 28 janeiru to’o 6 fevereiru 2021,  Komandu Jerál Polísia Nasionál Timor-Leste (PNTL) rejista durante loron 28 kazu hamutuk 91 ne’ebé akontese iha territóriu nasionál.

Portavós Komandu Jerál PNTL, Superintendente Xefe,  Arnaldo de Araújo informa,  iha dadus estatístika rejista kazu insidente hamutuk 56 no asidente hamutuk 35.

Nia informa PNTL rejista kazu ne’ebé akontese aas liu maka asalta-malu entre grupu no juventude hamutuk 27, taa-malu (haat), violénsia doméstika (15), tuda-mau (lima), Dezastre Naturaís (tolu), ahi-han uma (ida) no kazu omisídiu (ida).

Portavós Komandu Jerál PNTL Arnaldo de Araújo, segunda ne’e, informa ba jornalista liuhosi konferénsia imprensa iha Komandu Jerál PNTL, Dili,  katak kazu asidente tráfegu rezulta iha área Liquitura, Munisípiu Aileu ne’ebé karreta Grand Max A.2238 hetan estragus totál. Asidente ne’e la rezulta ema mate, maibé vítima sira sofre kanek.

PNTL Ainaro rejista mós asidente tráfegu Bus Tanete ho númeru matrikula 26572 baku fila iha área Ohoraikik-Maubisi. Asidente ne’e la rezulta pasajeiru ruma kanek no parte komunidade hamutuk ho populasaun sira konsege ajuda hodi foti hikas karreta ne’e.

Iha parte seluk, PNTL Baucau mós detein suspeitu mane ida ho inisiál SB, tinan 54, ne’ebé envolve iha kazu foti subar Kompañia Xineza Sanhai Construction nia ekipamentu iha loron 31 janeiru 2020.

Kazu ne’e akontese iha Aldeia Umbrai, Suku Vemasse Vila, Postu Administrativu Vemasse, Munisípiu Baucau no suspeitu foti subar kompañia nia ekipamentu hanesan, mákina las besi, mákina bomba bee-moos, mákina prodús porka, fiu las metru 100, tali korreia, mareta baku fatuk, janela uma roofing, kama toba fatin.

PNTL aprezenta ona kazu ne’e ba Ministériu Públiku, Munisipiu Baucau hodi prosesa tuir lei.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here