Ministra Saude Odete Maria Freitas Belo hamutuk ho Vise Ministru Bonifacio Maucoli dos Reis, inagura Sentru Saude Hatulia B (08/08/2020). Imajen/Felicidade Ximenes.

DILI, 08 fevereiru 2021 (TATOLI)—Durante fulan janeiru, Sentru Saúde Guisarudo postu administrativu Hatulia Zona B munisípiu Ermera, rejista pasiente ho moras Infesaun Respiratória Alta (IRA) no Enfermedad Diarreica Aguda (EDA) ka diareia ho númeru aas.

Xefe Sentru Saúde Guisarudo, Maria Madalena Leto, esplika pasiente IRA ne’ebé rejistadu ho númeru aas liu hamutuk 1.348 no tuir kedan diareia hamutuk 215.

Notísia Relevante:Ispa-diaréa rejista maka’as iha Hatulia

Hosi númeru pasiente IRA ne’ebé iha, mane na’in 559 no feto na’in 789, kona-bá pasiente diareia mane na’in 118 no feto na’in 97, ne’ebé laiha ema ruma mate tanba hetan asisténsia médika hosi Sentru Saúde ne’e rasik.

“Maski númeru pasiente moras rua ne’e aas, maibé la rejista ema ruma mate,” Maria Madalena Leto informa ba jornalista Agência Tatoli via telefónika.

Kona-bá kauza hosi moras rua ne’e, nia dehan, populasaun hosi Hatulia zona B sempre konsumu de’it  udan been nune’e afeita makaas ba sira nia saúde.

“Ami susar ba bee moos, nune’e baibain ami nia populasaun konsumu de’it udan been. Baibain sira nono maibé dalaruma la nakali sira hemu ona. Ida ne’e mak afeita makaas ba sira nia saúde,” nia dehan.

Nia hatutan, kona-bá pasiente diareia maioria labarik ho idade tinan 15 mai karaik, maibé rekopera hotu tanba ai-moruk mós sufisiente ba tratamentu.

Entretantu, Sentru Saúde Guisarudo Hatulia zona B iha profisionál saúde na’in sia kompostu hosi médiku, enfermeiru no parteira ne’ebé fó atendimentu ba komunidade hosi suku lima hanesan Fatubolu, Lisapat, Urahou, Mau-Ubu no Fatubesi.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here