Ofisiail Funsionariu husi Ministeriu Solidaderidade kontinua hala'o pagamentu subsidiu $200 ba komunidade sira. Imajen TATOLI/Antonio Goncalves.

DILI, 08 fevereiru 2021 (TATOLI)—Governu liuhosi Ministériu Solidaridade Sosiál no Inkluzaun (MSSI) finaliza ona pagamentu subsídiu $200 ba reklamante hamutuk 659 iha Rejiaun Adminsitrativa Espesiál Oé-Cusse Ambeno (RAEOA) maibé ekipa selu de’it ba uma-kain 651.

Notísia Relevante: Semana oin, Governu sei halo pagamentu ba reklamante sira iha RAEOA

“Governu finaliza ona pagamentu subsídiu $200 ba reklamante hamutuk 659 iha RAEOA. Ami selu mak ema na’in-651 no na’in-ualu (8), ami la selu tanba la marka prezensa iha fatin pagamentu nian,” Diretór Jerál MSSI, Rui Manuel Gago Exposto, ba Agência TATOLI iha nia knaar fatin, Caicoli, Dili, segunda ne’e.

Nia hatutan, pagamentu ne’e finaliza tiha ona iha fulan janeiru nia rohan iha sesta (29/01/2021) tuir kalendáriu ne’ebé Governu trasa ne’e atu termina iha sabadu (30/01/2021) maibé ekipa pagamentu MSSI nian  aselera no finaliza sedu de’it.

Rui informa, orsamentu ba reklamante na’in-ualu (8) nian ne’ebé la konsege simu, ekipa MSSI depozita ona ba kofre Estadu.

“Ita selu de’it mak 651 ho motante osan hamutuk miliaun $130,200/ Na’in-ualu (8) nia osan, ami fó fila osan ba kofre Estadu tanba sira sente la’ós merese atu simu no seluk mak ho razaun katak na’in-rua (2) simu ona iha Dili antes ne’e,” nia afirma.

Kona-ba totál orsamentu ne’ebé mak hatama fali ba kofre estadu, nia hateten, seidauk hatene tanba parte MSSI sei rekonsilia hela relatóriu sira no hein mós ho Banku Nasionál Komérsiu Timor-Leste (BNCTL-sigla portugés) atu emprime asbtratu banku pagamentu ba reklamente ba 2021 nian.

“Tanba ne’e, ita sei hein, bainhira BNCTL halo loos hotu mak foin fó sai dala ida ba públiku, kona-ba osan hira mak ita depozita fila ba kofre Estadu,” nia dehan.

Notísia Relevante: Governu finaliza ona pagamentu ba reklamante sira iha Munisípiu 12

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here