Logotipu BCTL

DILI, 08 fevereiru 2021 (TATOLI)–Banco Central de Timor-Leste (BCTL) lansa relatóriu trimestrál fundu petrolíferu ba dala-63, ne’ebé hanesan ba da-ikus tinan 2020, ne’ebé kobre husi 01 outubru to’o 31 dezembru 2020, sae ba biliaun $18,99.

“Relatóriu ne’e hatudu katak totál reseita ne’ebé mak simu iha trimestre ne’e hamutuk millaun $35,78, kompostu husi kontribuisaun kontribuinte sira ba fundu hamutuk millaun $27,41 no pagamentu royalty husi Autoridade Nasionál Petróleu (ANP) hamutuk millaun $8,37,” refere nota imprensa ne’ebé Agência TATOLI asesu, segunda ne’e.

Reseita trimestrál ikus tinan 2020 tun millaun $35,78, kompara ho trimestre datoluk ne’ebé kobre husi 01 jullu to’o 30 setembru ho reseita millaun $43,53 no totál fundu hamutuk biliaun $18,47.

Notísia relevante: Fundu petrolíferu sa’e ba biliaun $18,47, hosi kontribuisaun millaun $43,53

Enkuantu, rendimentu investimentu fundu hamutuk millaun $958,45, kompostu husi kupaun no juru ne’ebé simu hamutuk millaun $73,37.

Mudansa valór merkadu nian millaun $885,58 no movimentu cambiais lakon ho totál millaun -$0,50 iha trimestre ne’e.

“Ida-ne’e rezulta rendimentu ba  karteira fundu durante trimestre ne’e 5,21%, enkuantu rendimentu sasukat (benchmark) nian ba períodu ne’e mak 4,69%,” subliña nota ne’e.

Nune’e mos, osan kontadu líkidu ne’ebé sai husi fundu durante trimestre ne’e hamutuk millaun $471,69, kompostu husi millaun $466,80 transfere ba Orsamentu Jerál Estadu no millaun $4,859 kobre kustu jestaun nian.

Reseita líkidu durante trimestre ne’e hamutuk millaun $431,69 inklui reseita portofoliu iha peróodu ne’e mak 5,21%, kompara ho retornu referénsia mak 4,69%.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here