UPF halo operasaun iha liña fronteira terrestre. Imajen Tatoli/Eugénio Pereira

DILI, 08 fevereiru 2021 (TATOLI)- Portavós Komandu Jerál Polísia Nasionál Timor-Leste (PNTL), Superintendente Xefe, Arnaldo de Araújo, segunda ne’e, informa seguransa konjunta deporta Indonéziu ida ne’ebé halo viajen ilegál tama área fronteira Timor-Leste.

Abitante Indonézia ne’e  ho inisiál A, tinan 40, liuhosi Postu Malaka, Atambua-Indonézia  parte forsa konjunta entrega ba Servisu Migrasaun koopera ho Migrasaun Indonézia iha fronteira Covalima iha sesta (05/02).

Komandante Arnaldo dehan, Indonéziu ne’e forsa konjunta Unidade Patrullamentu Fronteira (UPF) no Unidade Espesiál Polísia (UPF) detein iha área fronteira Suku Beiseuk, Postu Administrativu Tilomar, Munisípiu Covalima, kinta (04/02).

Antes atu halo detensaun, parte forsa lori ai-moruk dezinfeta nia isin lolon hodi kontinua lori ba ekipa kuarentena ekipa COVID-19  Covalima nian hodi  hela iha kuarentena no kontinua halo prosesu investigasaun.

Abitante ne’e rekoñese nia hakat tama fronteira Timor-Leste, hodi buka nia karau ne’ebé lakon.

“Ita-nia forsa  konjunta deporta ona Indonéziu  tanba tuir investigasaun katak, nia buka nia karau ne’ebé lakon,” portavós PNTL, Arnaldo de Araújo, ba jornalista,  iha Komandu PNTL, Dili.

Iha loron 28 janeiru 2021, UPF detein mós sidadaun ida ho naran Filipe Amaral Vas Tilman, inklui menoridade na’in-rua ne’ebé halo viajen ilegál hosi Atambua-Indonézia ba Covalima.

Abitante na’in-tolu ne’e ekipa detein hodi submete ba uma kuarentena iha Covalima. Komandu PNTL alerta ba forsa konjunta kontinua halo seguransa metin iha liña fronteira hodi evita kualkér abitante nasaun rua, Timor-Leste no Indonézia atu halo movimentu ilegál hodi prevene ameasa surtu COVID-19.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here