Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos no Ministru Justisa Manuel Cárceres da Costa asina nota entendimentu hodi reforma programa entre Ministériu rua iha área reinsersaun Sosiál rekluzu, hodi promove direitu eis rekluzu no sira-nia reinsersaun iha komunidade iha Salaun MSSI, Caicoli, segunda (08/02). Imajen TATOLI/Egas Cristovão.

DILI, 08 fevereiru 2021 (TATOLI)–Ministru Justisa (MJ), Manuel Cárceres da Costa, hateten estatutu prizioneiru sira-nian mak dadur no estatutu nu’udar timoroan nafatin no la hasai maibé hasai de’it mak sira-nia liberdade.

Notísia Relevante: MSSI-MJ asina nota entendimentu iha área reinsersaun sosiál rekluzu

“Ita-nia prizioneiru sira-ne’ebé mak iha prizaun laran, nia estatutu mak dadur maibé nia estatutu nu’udar timoroan la hasai. Hasai de’it mak sira-nia liberdade no direitu atu la’o livre,” Manuel Cárceres da Costa hateten ba jornalsita sira bainhira asina nota entendimentu ho Ministra Solidaridade Sosiál no Inkluzaun iha salaun MSSI, Caicoli, Dili, segunda ne’e. 

Ministru ne’e hateten, prizioneiru sira iha komarka ne’e la’ós kastigu de’it maibé sira mós bele halo reflesaun ba sira-nia atetude ne’ebé mak sira halo iha komunidade nia leet.

“Dala barak ha’u ba vizita sira, ha’u dehan imi la’ós kastigu, imi mai kumpre imi-nia pena hanesan peniténsia ida depois transforma sira-nia aan. Ita prepara ita-nia maluk sira la’ós atu dada tan ema tama priziaun, lae. Ida tama prizaun ne’e, atetude ema ida-idak nian,” nia dehan.

Maibé, nia dehan, prizioneiru sira iha prizaun ne’e mós Governu prepara sira bainhira sai hosi prizaun ne’e, sira iha mentalidade atu labele halo sala buat ne’ebé sira halo ne’e mak hanaran prosesu rejistrasaun sosiál. 

“Bainhira Tribunál fó sai prizioneiru ida, nia tempu to’o atu sai, nia tenke sai. Maske iha loron domingu mós, nia tempu to’o, atu sai, nia tenke sai,” nia hateten.

Aleinde ida-ne’e, nia dehan, MJ nia programa ba dezenvolvimentu institusionál hametin instituisaun MJ nian hosi nasionál to’o munisípiu sira seluk mak formasaun ba grupu juiz foun sira, prokuradór no defensór sira. 

Kona-ba orsamentu estadu nian, nia informa, totál orsamentu 2021 nian ne’ebé Governu prevee ba Ministériu Justisa (MJ) hamutuk millaun $15-resin.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here