Plenária Parlamento Nasionál. Imajen TATOLI/Egas Cristovão.

DILI, 08 fevereiru 2021 (TATOLI)–Sekretária Meza Komisaun C (Finansa Públika), Deputada Nélia Soares Menezes, informa benefisiáriu hamutuk uma-kain 316 iha Munisípiu Manufahi seidauk simu subsídiu $200 tanba naran laiha lista pagamentu.

Notísia Relevante: Governu finaliza ona pagamentu ba reklamante sira iha Munisípiu 12

“Iha reklamasaun família agregadu familiár hamutuk 316 tanba naran la sai iha lista pagamentu, ne’ebé devolve fali orsamentu ba iha BNCTL hamutuk $177,000,” Sekretária Meza Komisaun C (Finansa Públika), Deputada Nélia Soares Menezes, ne’ebé akompaña hosi Prezidente Komisaun C, Deputada Maria Angélica Rangel, aprezenta relatóriu vizita fiskalizasaun ba Munisípiu Manufahi iha plenária PN, segunda ne’e.

Iha aprezentasaun relatóriu ne’e, Deputada Nélia Menezes, hateten dadus agregadu família ne’ebé aprezenta hosi autoridade lokál hamutuk família 15.808.

Dadus ne’e mak munisípiu enkamiña ba nasionál, nune’e Governu Sentrál aloka orsamentu millaun $3 maibé ekipa Ministériu Solidariedade Sosiál (MSSI) halo verifikasaun hetan família 14.918 no Governu Sentrál aprova orsamentu millaun $2,834-resin.

Deputada Nélia haktuir, família hamutuk 14.672 mak simu ona pagamentu ho totál orsamentu millaun $2,834.

“Reklamante hamutuk 316 família ne’ebé agora daudaun hein ninia prosesu tanba naran la sai lista pagamentu, osan ne’e devolve fali ba iha BNCTL,” Deputada Nélia fundamenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here