Ekipa Ofisiál Diplomata Konsulár Embaixada Xina akompañia hosi Komandante PNTL Dili, Superintendente Xefe, Henrique da Costa obserba sela detensaun Caicoli ne’ebé sei reabilita hosi Governu Xina. Imajen/MI.

DILI, 06 fevereiru 2021 (TATOLI)—Ekipa husi Komandu Polisia Nasionál Timor-Leste (PNTL) Munisípiu Dili, kompostu husi Seksaun Tránzitu, Servisu Investigasaun Kriminál no Task Force hahú loron sesta, 05 to’o 06 fevereiru ne’e hala’o ona limpeza jerál hodi hamoos jardin polisia no fatin detensaun PNTL Caicoli.

Segundu Komandante PNTL Dili, Superintendente Polisia, Euclides Belo, informa sira realiza atividade limpeza jerál ne’e atu asegura ambiente ida moos tanba iha tempu badak PNTL Caicoli sei hetan apoiu husi Governu Xina hodi reabilita sala detensaun ne’ebé daudaun ne’e iha kondisaun aat ona.

Notísia Relevante :PNTL sei aprezenta motorizada 400-resin atu leilaun

“Ekipa PNTL hahú hamoos hotu fo’er inklui tesi aihun boot sira ne’e no aruma motór apreensaun sira ne’e para didi’ak atu ita hadi’a fatin servisu ne’e sai di’ak liután,” dehan Komandante, Euclides Belo, ba Agência Tatoli, sábadu ne’e.

Superintendente Polisia, Euclides Belo, hatutan ambiente moos no seguru sei kontribui ba servisu membru sira-nian sai di’ak liután.

Nia rekoiñese motór apreensaun 400-liu ne’ebé durante ne’e para iha areadór PNTL Caicoli halo fatin ne’ebá sai kloot, tanba ne’e,  maka durante limpeza loron ne’e koopera ona ho Ministériu Obra Públika (MOP) no ekipa Bombeirus Dili hodi tesi ai-hun boot sira iha área PNTL Munisípiu Dili nian.

Kona-ba prosesu reabilitasaun sala detensaun nian, ekipa ofisiál Diplomata husi Konsulár Embaixada Xina hamutuk ho tékniku halo ona vizita hodi observa fatin detensaun refere.

Antes ne’e, Vise Ministru Interiór, António Armindo, rasik halo ona enkontru ho Embaixadór Xina ba Timor-Leste, Xiao Jianguo, ho Adidu Defeza Kolonél, Liu Miao, hodi diskute kona-ba polítika atu fó apoiu ba PNTL.

Notísia Relevante :Governu Xina apoia uniforme ba Komandu PNTL

Jornalista: Eugénio Pereira

Editór:Agapito dos Santos

HAKEREK NO HATÁN

Please enter your comment!
Please enter your name here