Reitór UNTL, João Soares Martins. Imajen Tatoli/Tomé Amado.

DILI, 05 fevereiru 2021 (TATOLI)—Maski seidauk iha data fixu, maibé Reitór Universidade Nasionál Timor Lorosa’e (UNTL), João Soares Martins garante katak, prosesu inskrisaun ba estudante foun sei hahú iha semana oin.

Ha’u garante katak, semana oin prosesu inskrisaun ba ita-nia alin estudante foun sira bele hahú ona. Tanba ne’e, segunda ba oin ita sei diskuti uluk atu desidi data fixu ba inskrisaun, tanba agora ha’u labele desidi rasik,” Reitór UNTL hateten ba jornalista sira iha salaun Ian Martin INFORDEPE Balide, sesta (05/02).

Notísia Relevante:Estudante 5.582 admitidu ba UNTL no IPB

Líder másimu UNTL ne’e hatutan, polítika instituisaun nian maka, bainhira simu ona rezultadu hosi Ministériu Ensinu Superiór Siénsia no Kultura (MESSK) kona-bá estudante admitidu sira, faze tuir mai, universidade sei hahú konvoka reuniaun atu bele desidi tempu inskrisaun nian.

Reitór ne’e konsidera estudante rejimi jerál no rejimi espesiál ne’ebé admitidu hamutuk 5.282 hanesan númeru ki’ik liu kompara ho tinan 2016 hamutuk 9.000-resin.

João Soares Martins fiar no garante katak, UNTL iha fatin sufisiente atu akumula estudante hirak ne’e ba prosesu aprendizazen.

Entretantu, estudante rejimi jerál no rejimi espesiál ne’ebé admitidu atu asesu ba Ensinu Superiór Públiku Universidade Nasionál Timor Lorosa’e (UNTL) no Institutu Politékniku Betano (IPB) ba tinan akadémiku 2021 hamutuk 5.582.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here