Konferénsia imprensa AIFAESA, iha Matadouro, sesta (05/02). Imajen/AIFAESA

DILI, 05 fevereiru 2021 (TATOLI)—Koordonadór Autoridade Inspesaun no Fiskalizaun Atividade Ekonómika, Sanitária no Alimentár, Institutu Públiku (AIFAESA, IP), Abílio Oliveira Sereno, hateten rezultadu analiza laboratóriu ba na’an fahi no na’an karau ne’ebé mak fa’an iha Leader la kontaminadu, nune’e konsumidór sira bele sosa hodi konsome.

Koordenadór ne’e haktuir, relasiona ho kazu ai-han ne’ebé deskonfia kontamina no lanu (envenenadu) sidadaun na’in-tolu iha loron 12 janeiru 2021, iha aldeia Fomento III, suku Comoro, postu administrativu Dom Aleixo, munisípiu Dili, ho nune’e iha loron 13 janeiru  ekipa AIFAESA hamutuk ho Ministériu Saúde, Diresaun Nasionál Saúde Públiku, Departamentu Vijilánsia Sanitária no Saúde Ambientál, no Polísia Sientífiku no Investigasaun Kriminál Timor-Leste (PCIC, sigla portugés) hala’o atuasaun ba insidénsia refere.

“Tuir informasaun ne’ebé ekipa AIFAESA asesu katak sidadaun hirak ne’e lanu tanba konsume na’an fahi no na’an karau ne’ebé fornese husi empreza Leader Hypermarket, lokalizadu iha suku Comoro, postu administrativu Dom Aleixo, munisípiu Dili iha ámbitu implementasaun programa Cesta bázika,” Koordonadór AIFAESA dehan, iha Matadouro, sesta ne’e.

Nia hatutan, bazeia ba informasaun refere, ekipa konjunta haree hodi bele deteta kauza husi moras.

“Ekipa kolleta amostra produtu sira ne’ebé deskonfia hanesan na’an fahi no na’an karau, no mós amostra fezes sidadaun envenenadu sira, hodi submete ba Laboratóriu Nasionál Saúde hodi halo análiza.

Aleinde ne’e, ekipa mós rekolla informasaun no dadus relevante ba prosesu rastreabilidade,” nia hatutan.

Iha sorin seluk, Diretór Planeamentu Operasionál Risku Alimentár no Laboratóriu AIFAESA, Ângelo Edmundo Belo, hateten iha loron 29 janeiru 2021, autoridade simu rezultadu analiza husi laboratóriu ne’ebé hatudu katak amostra na’an fahi no na’an karau hirak ne’e la kontaminadu ho substánsia perigozu (mikroorganizmu), ne’ebé fó implikasaun ba ema-nia saúde.

“Laboratóriu Nasionál Saúde mós deteta mikróbiu (batéria) seluk ne’ebé asosia ho na’an fahi no na’an karau mak hanesan proteus mirabilis, pseudomonas stutxeri, Aeromanas hydrophila, Enterobacter cloacae, wautersiella falsenii no Hafnia  alvei, maibé, mikro-organizmu sira ne’e normalmente eziste iha animál nia isin no ambiente ne’ebé la fó impaktu ba saúde umanu (la’ós zoonótiku),”  Diretór AIFAESA konfirma.

“Bazeia ba rezultadu analiza laboratoriál AIFAESA, hakarak hato’o ba konsumidór sira hotu katak amostra husi produtu na’an karau no na’an fahi ne’ebé ekipa konjunta rekolla hodi submete ba analiza laboratoriál la deteta bakteria patojéniku signifika la kontaminadu,” nia informa.

Ho nune’e, produtu ne’ebé empreza Leader komersializa iha kondisaun ne’ebé di’ak atubele konsome.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here