Militante no simpatizante Partidu Libertasaun Popular (PLP) bainhira partisipa iha kampaña Parlamentár ne’ebé hala’o iha Tasi Tolu, Dili, domingu (16 Jullu 2017), ba eleisaun Parlamentár ne’ebé hala’o iha 22 Jullu 2017. Imajen TATOLI/Antonio Goncalves.

DILI, 05 fevereiru 2021 (TATOLI)—Partidu Libertasaun Populár (PLP) uza atribuisaun subvensaun públika hosi Komisaun Nasionál Eleisaun (CNE-sigla portugés) ba formasaun no polítika no kontinua hala’o kontaktu regulár ho apoiante.

Notísia Relevante: CNE apresia relatóriu subvensaun públika hosi partidu asentu parlamentár

Terseira Vise-Prezidente PLP, Maria Angelina Lopes Sarmento, esplika subvensaun públika ne’ebé atribui ba partidu polítiku sira, hosi PLP hanesan bankada foun no partidu foun ne’ebé hetan asentu parlamentár, ne’ebé komesa kedas iha 2018 no 2019.

Nia dehan, osan ne’e uza hodi formasaun polítika no mós atividade kontaktu regulár ho partidu ninia militante no kuadru sira iha nível munisípiu, no simpatizante sira iha baze.

Nia akresenta, PLP uza subvensaun ne’e ho mekanizmu diferensa uitoan ho partidu sira seluk, tanba obrigatoriamente munisípiu no postu administrativu tenke iha konta bankária rasik.

Nia haktuir, bazea ba kritéria ne’e mak iha 2019 ne’e, munisípiu sira iha ona konta bankária no iha 2020 ba postu administrativu sira hodi nune’e idak-idak jere osan ne’e ba atividade partidu nian.

Molok kuadru munisípiu no postu administrativu atu asesu subvensaun ne’e tenke aprezenta planu ba sekretariadu nasionál depois sekretariadu halo análize ba proposta hafoin halo aprovasaun ba osan ne’e nune’e evita osan cash.

“Kada asentu parlamentár (kada kadeira) hetan rihun $92 no ami kadeira ualu (8), kada tinan ami hetan rihun $736. Osan ne’e, ami uza hodi reforsa liuhosi kontaktu regulár ho kuadru estrutura sira iha munisípiu, postu administrativu no suku sira. Formasaun polítika no formasaun ne’e parte ida halo investimentu rekursu umanu partidu nian,” Maria Angelina Lopes Sarmento informa ba Agência TATOLI iha resintu PN, setsa ne’e.

Nia hatutan, osan ne’e mós utiliza ba kontaktu eleitorál hodi bele esplika asaun ne’ebé Governu iha no dinámika polítika ne’ebé akontese.

“Atividade sira-ne’e ninia objetivu prinsipál mak atu oinsá reforma komunikasaun polítika ho kuadru estrutura sira nível munisípiu to’o baze no mós atu partilla informasaun kona-ba dinámika polítika ne’ebé akontese iha VIII Governu Konstitusionál. Inklui, orsamentu sira-ne’ebé gasta durante governasaun ida-ne’e no programa sira-ne’ebé mak lori benefísiu diretamente ba ita-nia povu,” nia hateten. 

Nune’e mós abranje liután informasaun kona-ba programa saida de’it mak Governu ida-ne’e realiza ona no programa ida realiza ne’e mai hosi kompromisu polítiku partidária nian ne’ebé hala’o iha kampaña durante eleisaun parlamentár 2018 nian.

Tanba komunikasaun ida-ne’e presiza kontinua atu hato’o fila-fali ba militante sira, kuadru sira no esturura sira katak programa sira-ne’ebé mak elabora durante períodu kampaña eleitorál.

Tuir nia, osan ne’e atu fasilita hosi fahe informasaun ba militante sira atu bele komprende no intende di’ak liután kona-ba partidu nia vizaun, misaun, filozófia no partidu nia aprosimasaun ba dezenvolvimentu inklui karáter lideransa ida-ne’ebé militante no kuadru sira hakarak atu lori dezenvolvimentu di’ak liután.

Nia dehan, to’o agora PLP seidauk iha sede permanente no sede nasionál mak iha Metiaut, Dili, maibé ba futuru sei haree fali sede ida-ne’ebé adekuada no konfortável liu nune’e membru sira hala’o servisu ho di’ak.

Sede iha munisípiu, nia dehan, seidauk iha tanba PLP nu’udar partidu foun no foin mak hetan subvensaun públika tinan-ida ho balun, tanba ne’e seidauk bele halo buat hotu-hotu.

“Ne’e duni konstrusaun fízika ami seidauk halo maibé oinsá mak atu hametin komunikasaun polítika. Ida-ne’e mak ami-nia alvu prinsipál,” nia hateten.

Nia subliña, PLP foin moris iha 2016 atu ba 2017, espontaneamente ema mai partisipa iha partidu refere tanba haree katak durante tinan naruk nia laran partidu seluk ho figura ne’ebé nafatin, filózofia ida mak nafatin.

“Entaun ema hakarak ambiente foun. Ema hakarak haree lideransa foun ho perspetiva foun no lideransa ida-ne’ebé ema hakarak haree dehan duru iha Governasaun ida di’akliu, governasaun ida moos,” nia dehan.

Tanba, tuir nia, rekursu umanu iha PLP rasik preparadu tanba kuadru sira maioria joven ne’ebé hakarak haree mudansa ba dezenvolvimentu iha rai ida-ne’e.

“Hakarak haree rai ida-ne’e presiza iha transformasaun hosi difikuldade sai di’akliu,” Terseira Vise-Prezidente PLP ne’e informa.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here