Vise-Koordenadora Forsa-Tarefa ba Prevensaun no Metigasaun Surtu COVID-19 no atuál Diretora jerál Prestasaun Saúde-Ministériu Saúde, Odete da Silva Viegas. Imajen Tatoli/Egas Cristóvão

DILI, 05 janeiru 2021 (TATOLI)— Ministériu Saúde (MS) apela ba públiku atu labele fiar informasaun ne’ebé espalla katak, iha ona transmisaun lokál COVID-19 iha Timor-Leste (TL).

“Iha rumoris barak hateten Timor-Leste iha ona transmisaun lokál, maibé Ministériu Saúde husu nafatin ba públiku labele fiar no pániku banhira laiha konfirmasaun hosi parte saúde,’’ Koordenadora Jerál Komisaun Nasionál Prevensaun COVID-19, Odete da Silva Viegas, ba jornalista sira iha Palásiu Sinzas, Caicoli, sesta (05/02).

Notísia Relevante:Pasiente COVID-19 na’in-haat fila bá família

Ministériu Saúde garante katak to’o oras ne’e seidauk iha transmisaun lokál tanba ministériu rasik sempre halo maneira hotu-hotu hodi submete kualkér sidadaun ba kuarentena obrigatóriu bainhira tama mai Timor-Leste.

Maneira seluk maka, bainhira iha ema ruma tama mai ilegál, autoridade sira entrega kedan ba profisionál saúde hodi halo kuarentena.

Alende ne’e, ekipa saúde sempre halo vizilánsia iha ospitál sira atu buka hatene kona-bá transmisaun lokál ne’ebé to’o oras ne’e seidauk iha faktus ruma.

Tanba ne’e, Odete husu nafatin ba públiku atu uza medida preventiva ne’ebé iha, hanesan uza máskara, fase liman beibeik ho sabaun, no mantein distansiamentu sosiál.

Jornalista: Felicidade Ximenes

Editór: : Cipriano Colo

HAKEREK NO HATÁN

Please enter your comment!
Please enter your name here