Ministru Asuntu Parlamentár no Komunikasaun Sosiál, Francisco Jerónimo. Imajen TATOLI/Egas Cristovão

DILI, 05 fevereiru 2021 (TATOLI)Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, relata progresu instalasaun sistema dijitalizasaun Rádiu no Televizaun Timor-Leste, Empreza Públika (RTTL,E.P) ba Primeiru-Ministru (PM), Taur Matan Ruak.

“Hasoru malu ho Primeiru-Ministru atu informa kona-ba progresu dijitalizasaun RTTL,” Ministru Francisco hateten hafoin ramata reuniaun regulár ho Xefe Ezekutivu, sesta ne’e, iha Palásiu Governu.

Iha sorumutuk ne’e, MAPKOMS relata mós kona-ba loron lansamentu sistema dijitalizasaun RTTL, ne’ebé sei realiza iha loron 16 fevereiru 2021, iha suku Guiço, postu administrativu Maubara, munisípiu Liquiçá.

Nune’e, Xefi Governu fó instrusaun atu realiza programa instalasaun sistema dijitalizasaun ne’e ho lalais, nune’e to’o tinan 2023 populasaun iha territóriu Timor-Leste tomak bele ona asesu ba informasaun ho kualidade liuhosi mídia estatál ne’e.

Biban ne’e, PM husu atu aselera diskusaun no aprovasaun ba lei sira ne’ebé mak tama iha komisaun no lei foun sira ne’ebé Governu sei submete ba Parlamentu Nasionál, liuliu fó prioridade ba Lei Orsamentu Jestaun Estadu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here