Diretór Jerál Servisu Korporativu, Joanico Pinto hamutuk ho Diretora Jerál Tezouru, Regina de Jesus da Sousa, klarifika pagamentu saláriu fulan-janeiru. Imajen TATOLI/Florêncio Miranda Ximenes

DILI, 05 fevereiru 2021 (TATOLI)—Ministériu Finansa (MF), liuhosi Diresaun Nasionál Servisu Korporativu, klarifika Governu foin lalais rekorre ba fundu kontinjénsia tanba atu asegura pagamentu décimo terceiro, ne’ebé la prevee iha Orsamentu Jerál Estadu (OJE) 2020.

Enkuantu, iha loron 20 novembru 2020, Konsellu Ministru (KM) aprova pagamentu estraordináriu saláriu adisionál fulan-ida ba administrasaun públika iha fulan-dezembru.

Notísia relevante: Governu aprova saláriu désimu terseiru ba administrasaun públika

Ba kestaun ne’e, Diretór Jerál Servisu Korporativu, Ministériu Finansa (MF), Joanico Pinto, dehan bainhira KM aprova ona saláriu décimo terceiro, MF tenke halo ezersísiu halo pagamentu, tanba orsamentu ba saláriu normál ne’e halo previzaun de’it hahú husi 01 janeiru to’o 31 dezembru de’it.

“Saláriu extra (décimo terceiro) ita la prevee iha Orsamentu Jerál Estadu, entaun tenke halo ezérsisiu ho ministériu sira ne’ebé ita identifika nia orsamentu sei sufisiente atu halo pagamentu ne’e kontinua halo, maibé ba ministériu sira ne’ebé osan la to’o ona hakarak ka lakohi ita tenke adianta osan husi fundu rezerva kontinjénsia atu fasilita pagamentu ida ne’e,” nia esplika.

Nia dehan, sálariu normál ba servidór Estadu laiha razaun atu foti osan husi fundu kontinjénsia tanba ministériu sira bele halo tranferénsia dentru nia orsamentu de’it.

Notísia relevante: Husi funsionáriu 43.351, falta 144 maka seidauk simu saláriu janeiru

Diretór Jerál ne’e esplika, konaba-ba lei númeru 13/2009, 21 outubru, orsamentu no jestaun finanseira, tenke prevee 5% ba fundu kontinjénsia husi totál OJE kada tinan.

“Lei ne’e dehan orsamentu iha kontinjénsia ne’e tenke iha 5% husi montante orsamentu Estadu, maibé prátikamente kada tinan ita tau la to’o 5%,” nia akresenta.

Nia fó ezemplu, hanesan OJE 2021 ho montante biliaun $1,8, signifika 5% husi totál ne’e loloos tau iha rezerva fundu kontinjénsia, maibé prátikamente prevee la to’o ida-ne’e.

Tanba ne’e, MF husu ba ministériu sira bainhira atu halo tranférensia tenke iha justifikasaun tanba kada ministériu mak halo planu no proposta OJE kada tinan, maibé orsamentu la sufisiente.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here