Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 05 fevereiru 2021 (TATOLI)—Vise-Prezidente Parlamentu Nasionál, Deputada Maria Angelina Lopes Sarmento, hateten feto nia prontindaun no paixaun mak bele determina karreira iha vida polítika.

Vise-Prezidente Parlamentu Nasionál ne’e hatutan, iha mundu partisipasaun feto iha polítika mak di’akliu ona no mós iha Ázia maibé feto Timor-Leste labele orgullu ho ida-ne’e. Feto Timor-Leste presiza hadi’a nafatin kada tempu, kada opurtunidade ne’ebé mak iha nune’e sai lisaun aprendida.

Tanba ne’e feto Timor-Leste presiza hatene parte fraka mak ne’ebé, di’ak ona presiza mantein no ladi’ak ne’e husik tiha soe ba kotuk.

“Maibé prinsipalmente hosi ha’u-nia esperiénsia rasik, ha’u hakarak haree feto nia prontidaun no paixaun interemu pesoál ida. Tanba ita bele iha lei di’ak , bele iha enkuadramentu obriga feto atu bá oin maibé feto rasik la prontu entaun ita labele obriga feto atu bá. Ita haree feto ne’e kuantidade de’it, kualidade ne’e sei kestionável hela,” nia ko’alia iha Parlamentu Nasionál, sesta ne’e.

Terseira Vise-Prezidente Partidu Libertasaun Populár ne’e fó hanoin ba ninia feto maluk sira atu kontinua halo investimentu ba aan rasik no labele hein partidu mak investe.

Nia sublina, bainhira iha tempu atu aprende tenke aprende kedas tanba iha ona esperiénsia ne’e oportunidade mosu hodi atu aplika matenek ne’ebé feto sira iha.

“Ba ha’u, ita tama iha partidu la’ós tempu atu aprende. Tama iha partidu ne’e tempu atu aplika matenek ne’ebé mak ita iha hosi li’ur hodi ajuda partidu bele kontribui ba nasaun ida-ne’e,” nia dehan. 

Nia dehan,polítika intermu lejizlasaun sira di’ak ona tanba enkoraja tebes feto sira atu partisipa iha polítika maibé depende ba individu idak-idak ninia interese ho paixaun hodi nune’e kontribui ba partidu.

“Tanba lei iha ona dehan lista feto nian be, feto mak tenke bá, lae, feto ida oinsá lai. Ba ha’u-nia pesoál, ha’u ba hanesan feto maibé la’ós ba (tama partidu) tanba ema dehan belas kasihan maibé tanba pezu iha mak bá. Ida-ne’e mak ha’u-nia prinsípiu,” Vise-Prezidente PN ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here