Prezidente Conselho de Imprensa, Virgilio Guterres. Imajen/Dokumentasaun Tatoli.

DILI, 05 fevereiru 2021 (TATOLI)—Prezidente Conselho de Imprensa Timor-Leste, Virgílio da Silva Guterres, hato’o sentidu solidariedade no simpatia ba Konsellu Imprensa Myanmar nu’udar kontestu ida bele kontinua salva guarda universál relasiona ho situasaun polítika atual ne’ebé akontese iha Myanmar.

Notísia Relevante: Nasaun Haat Konkorda Estabelese Rede KI Sudeste Aziátiku

Conselho de Imprensa Timor-Leste hato’o sentidu solidaridade ba Myanmar ho objetivu hakarak atu manifesta sentidu solidariedade hamutuk ho jornalista sira iha nasaun Myanmar liuliu kona-ba liberdade espresaun informasaun atu asegura ezisténsia ba liberdade jornalista sira-nian.

“Relasaun ho situasaun Myanmar nian, ami hakarak atu espresa ami-nia solidariedade no simpatia ba Konsellu Imprensa Myanmar, U Myo Thant Tyn, espera katak ida-ne’e nu’udar kontestu ida bele kontinua atu bele sai salva guarda universál ida ba direitu relasiona ho liberdade espresaun, informasaun no mós seguransa ne’ebé mak halo hodi asegura ezisténsia ba liberdade jornalista sira-nian,” Prezidente Conselho de Imprensa Virgílio da Silva Guterres, hateten ba jornalista sira liuhosi konferénsia imprensa ne’ebé hala’o iha Salaun CI, Quintál-Boot, Dili sesta ne’e.

Nia hatutan, CI Timor-Leste nia esperansa no votu ne’ebé fó ba Myanmar katak sira bele kontinua nu’udar ezérsitu ba sira-nia atividade ne’ebé mak sai matadalan ba sira-nia profisionál iha nivél altu no mós prinsípiu téniku nian.

“Conselho de Imprensa Timor-Leste, prontu nafatin fó apoiu ba Konsellu Imprensa Myanmar no hosi jornalista sira hotu iha nasaun laran, espera katak ema hotu-hotu tenke hatene oinsá bele buka dalan di’ak atu ultrapasa liuhosi dalan diálogu no hamosu diskusaun ho ideia sira saudavél,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here