DILI, 05 fevereiru 2021 (TATOLI)—Sekretaria Estadu Formasaun Profisionál no Empregu (SEFOPE) suspende provizóriu lian koreia tanba Estadu Emerjénsia (EE) liga ho COVID-19.
“Daudaun ne’e ami sei diskute hela, tanba COVID-19 maka kursu ne’e kuandu la’o, ami haree medida Estadu Emerjénsia katak ema labele halibur malu barak liu, tanba ne’e segunda ami sei koordena hamutuk ho ekipa husi parte Koreia ne’ebé fó formasaun lian koreia, atubele haree sistema didi’ak,” Diretór Nasionál Empregu Esteriór (DNEE) husi SEFOPE, Filomeno Soares, informa ba Agência TATOLI, sesta ne’e, via telefone.
Notísia relevante: Traballadór 460 sei aranka bá Korea Súl hafoin aeroportu loke
Nia konsidera sidadaun hotu tenke kumpre regra EE ba saúde públika, nune’e bele prevene kontájiu COVID-19.
“Ha’u hanoin ida-ne’e regulamentu ita tenke kumpre tanba COVID-19 perigozu, tanba ne’e ita iha obrigasaun atu kumpre nune’e bele prevene moras ne’e,” nia akresenta.
Kursu lian koreia durante fulan-neen hanesan kritéria ida ba traballadór timor-oan sira molok bá serbisu iha Koreia Súl.
Hafoin tuir kursu, tuir fali teste médiku no rejistu iha sistema baze dadus, no bainhira hetan ona kontratu sei tuir ezame médiku dala-ida tan, ne’ebé kuandu identifika saúde ladún di’ak labele kontinua.
Totál traballadór timor-oan iha Koreia Súl hamutuk 3.000-resin no 705 mak fila mai ona Timor-Leste, ne’ebé kuaze ho durasaun serbisu tinan-tolu to’o lima.
Jornalista: Natalino Costa
Editora: Julia Chatarina
