Primeiru-Ministru, Taur Matan Ruak. Imajen TATOLI/Egas Cristovão

DILI, 04 fevereiru 2021 (TATOLI)Primeiru Ministru (PM), Taur Matan Ruak, kontinua enkoraja instituisaun Estadu tomak inklui sidadaun sira atu konsolida forsa hamutuk prevene propagasaun COVID-19.

“Ita-nia númeru pozitivu COVID-19 aumenta maka’as loos, agora ita kontinua serbisu atu mantein susesu tanba daudaun seidauk rejista ema mate. Ita presiza hametin liután atu konsolida, maibé labele Governu mesak de’it maibé presiza órgaun Estadu hotu no sidadaun nia kontribuisaun ba prevensaun ne’e importante loos,” PM Taur hateten hafoin sorumutuk semanál ho Prezidente Repúblika, Francisco Guterres ‘Lú Olo’, iha Pálasiu Prezidensiál, Bairro Pité, kinta ne’e.

Notísia relevante: Hahú ohin, Governu ofisialmente reativa Sala Situasaun

Xefe Ezekutivu dehan, Governu preokupa tanba iha dezembru 2020 to’o mai janeiru tinan ne’e, númeru pozitivu COVID-19 aumenta, tanba ne’e ho estensaun Estadu Emerjénsia (EE) ba da-sanulu deside reativa Sala Situasaun, Sentru Integradu Jestaun Krize (CIGC, sigla portugés) hodi hakbiit kontrola fronteira no kuarentena sira.

Sala Situasaun lidera husi Primeiru-Ministru, ho sentru ida iha Dili, iha Sentru Konvesaun Dili (CCD, sigla portugés) ho unidade tolu iha Rejiaun Administrativu Espesiál Oé-cusse no Ambeno (RAEOA), Covalima no iha Bobonaro.

“Nune’e bele hakbiit ita-nia an atu kontrola maka’as sidadaun tama-sai fronteira no kuaretena sira tanba iha ema ko’alia katak iha kuaretena Oé-cusse iha ema dansa fali iha laran tanba laiha ema kontrola ho di’ak,” nia akresenta.

Aleinde ne’e, Sala Situasaun ninia ezisténsia atu avalia kbiit, liuliu haree ba evolusaun situasaun bainhira kontájiu komunitáriu iha ona inklui senáriu pior ne’e, Timor-Leste iha kbiit atu responde.

Nune’e mós, bele reforsa atividade sensibilizasaun ba komunidade sira atu ita hotu bele tau atensaun maka’as ho moras ne’e atu evita kontájiu komunitáriu.

“Iha fulan-10 ona ita konsege evita ema mate iha ita-nia rai, ne’e susesu boot ne’ebé ita tenke kontinua esforsu nafatin,” nia hatutan.

Atuál Ministru Interiór ne’e mós rekoñese, daudaun membru Polísia Nasionál Timor-Leste (PNTL) sira iha área fronteira terrestre serbisu maka’as hodi hamenus ema tama via ilegál ba territóriu nasionál.

Governu liuhosi Ministériu Interiór esforsu atu ema tama ilegál, presiza hetan sensibilizasaun atubele aprezenta-an iha CIGC hodi kontrola nia saúde iha kuarentena.

“Ita mós labele iha iluzaun atu taka iha fronteira hanesan taka bee la sai, tanba fronteira hanesan espasu ida-ne’ebé iha ligasaun, naturalmente ida rua liu maibé tenke kumpre hafoin ba uma labele lori kontájiu ba ema seluk,”  Xefe Governu afirma.

Iha kuarta (03/02), Ministériu Saúde (MS) rejista tan timor-oan na’in-rua pozitivu COVID-19.

Entretantu, tuir dadus husi MS iha loron 03 fevereiru 2021, hatudu katak kazu foun +2, komulativu kazu 77, atuál baixa iha izolamentu 24, kompostu husi Dili 23 no RAEOA na’in-ida.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here