Diretór Nasionál Aprovizionamentu, Quintiliano A. Belo. Imajen/MOP

DILI, 04 fevereiru 2021 (TATOLI)Diretór Nasionál Aprovizionamentu (DNA) iha Ministériu Obra Públika (MOP), Quintiliano Belo, konsidera atu fasilita serbisu aprovizionamentu ho di’ak maka presiza simplifika duni dekretu lei númeru 10/2005 kona-ba rejime jurídiku aprovizionamentu.

Tanba ne’e, daudaun tékniku legál MOP partisipa mós iha diskusaun ba proposta Ministériu Finansa (MF), ne’ebé atu halo alterasaun ba rejime júridiku foun atu simplifika prosesu aprovizionamentu.

“Ami fó hanoin balun, maibé komforme ha’u rona informasaun katak atu dijitaliza prosesu aprovizionamentu tomak, ne’ebé dijitalizasaun ne’e presiza aplikasaun ida, kompañia sira ne’ebé mak kompete dijitalmente no la presiza hatama dokumentu iha edifísiu,” Diretór ne’e dehan ba Agência TATOLI iha ninia knaar fatin, Caicoli, kinta ne’e.

Notísia relevante: Altera dekretu-lei aprovizionamentu, CCI-TL tau esperansa ba Governu

Nia nota katak alterasaun ne’e bele fasilita prosesu aprovizionamentu ne’ebé naruk bainhira loke konkursu públiku.

“Atu fasilita serbisu aprovizionamentu nian tenke simplifika duni dekretu lei ne’e, tanba lei ida agora ne’e la’ós komplikadu, lei di’ak maibé ninia prosesu mak naruk demais, ezemplu hanesan modalidade aprovizionamentu International Competitive Bidding (ICB) ne’e tenke han tempu fulan-neen, hahú husi fó sai avizu to’o iha publikasaun rezultadu,” Quintiliano Belo akresenta.

Nia dehan, inisiativa MF atu simplifika bele hamenus tempu no rekerimentu balun ne’ebé komplika empreza sira.

Dirijente ne’e esplika, kona-ba modalidade aprovizionamentu iha tolu mak hanesan Request for Quotation (RFQ) ne’ebé projetu ho valór $100,000 mai kraik, National Competitive Bidding (NCB) ho projetu valór $100,001 to’o $200,000 no ICB ho valór $200,001- $1,000,000.

Nia dehan, durante ne’e ezijénsia Kámara Komérsiu Indústria Timor-Leste (CCI-TL, sigla portugés) maka NCB liu millaun $1, nune’e timor-oan sira mak kompete malu de’it, la’ós kompete fali ho ema estranjeiru.

“Dekretu lei pra-kualifikasaun ne’e konsege implementa tiha ona hahú iha 2015, maibé tanba sistema baze dadus ne’e mate ou la funsiona entaun paradu. Iha VIII Governu ne’e hakarak kontinua, no agora halo ona manutensaun ba sistema ne’e no prontu ona atu loke maibé MOP halo diskusaun ho CCI-TL, ne’ebé antes loke tenke armoniza lei pra-kualifikasaun ho lei aprovizionamentu,” nia hatutan.

Lei aprovizionamentu durante ne’e limita timor-oan atubele kompete iha projetu ho valór miliaun $1 ba leten.

“Preokupasaun setór privadu nasionál sira-nia hakarak modalidade sira ne’e tenke troka, nune’e emprezáriu timor-oan sira mós bele kompete ba obra ho valór millaun $1 ba leten,” nia tenik.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here