Enkontru entre Sekretáriu Estadu Komunikasaun Sosiál, Merício Juvinal dos Reis ‘Akara’ no Prezidente CVTL, Madalena Hanjam, iha Gabinete SEKOMS, Palásiu Governu, kinta (04/02). Imajen/Mídia SEKOMS

DILI, 04 fevereiru 2021 (TATOLI)Sekretaria Estadu Komunikasaun Sosiál (SEKOMS) no Krús Vermella Timor-Leste (CVTL, sigla portugés) deskute divulgasaun informasaun kona-ba medida prevensaun COVID-19 ba komunidade.

Sekretáriu Estadu Komunikasaun Sosiál, Merício Juvinal dos Reis ‘Akara’, hateten enkontru ne’e atu instituisaun rua bele haree konsensializa komunidade prevene pandemia.

“Buat sira ne’ebé maka ohin Krús Vermella ko’alia ami rejista, nune’e ba oin ekipa téknika bele haree ona ba nível implementasaun, liuliu ba divulgasaun ba prevensaun COVID-19 nian,” Sekretáriu Estadu Akara informa hafoin ramata enkotru ho Prezidente CVTL, kinta ne’e, iha Palásiu Governu.

Parte SEKOMS koordena ona ho ninian ekipa, nune’e mós ba parte mídia atu fasilita informasaun ba komunidade iha Dili no área rurál atu hafanu kontinua prevene COVID-19.

“Ita iha mídia estatál rua hanesan Rádiu Televizaun Timor-Leste, Empreza Públika (RTTL, E.P), Agência TATOLI inklui Rádiu Komunidade 16 atu sira bele ajuda ita divulga informasaun ne’ebé nasaun konsidera importante, la’ós ba sira de’it maibé ita mós halo parseria ho mídia privadu sira atu envolve mós ba divulagasaun informasaun”, nia akresenta.

Iha fatin hanesan, Prezidente CVTL, Madalena Hanjam, hateten enkontru ne’e atu kria kooperasaun apoiu CVTL nia atividade, liuliu ba prevensaun COVID-19, tanba SEKOMS iha papél divulga informasaun.

“Informasaun ne’e labele ba ema ida ka rua de’it, maibé oinsá ba komunidade sira iha área rurál, tanba ne’e husu SEKOMS atu kontinua halo divulgasaun informasaun COVID-19 iha rádiu no televizaun,” nia akresenta.

Nia nota mós katak, iha komunidade barak maka hela iha área besik fronteira terrestre hanesan Oé-cusse, Covalima, Bobonaro no iha Dili, ne’ebé iha risku ba kontájiu COVID-19, tanba ne’e presiza kontrola.

Nia dehan, daudaun parte ekipa CVTL ne’ebé hanesan voluntáriu rasik prontu apoiu Governu iha kualkér tempu hodi ajuda komunidade iha área rurál divulga informasaun ba prevensaun pandemia.

“Ami-nia voluntáriu sira prontu atu ajuda halo atividade bainhira komunidade sira presiza, ita labele husik komunidade ida iha kotuk,”  Madalena Hajam subliña.

Jornalista: Natalino Costa  

Editora: Julia Chatarina

HAKEREK NO HATÁN

Please enter your comment!
Please enter your name here