Xefe Klínika Médiku Jerál Komandu PNTL, Inspetora Marcelina E. da C. Ximenes. Imajen Tatoli/Eugénio Pereira

DILI, 04 fevereiru 2021 (TATOLI)-Komandu Polísia Munisípiu Dili servisu hamutuk ho ekipa Médiku Komandu Jerál PNTL hala’o sensibilizasaun kona-ba COVID-19 relasiona ho moras hada’et no moras la hada’et ba membru PNTL na’in-60.

 Xefe Klínika Médiku Jerál Komandu PNTL, Inspetora Marcelina E. da C. Ximenes, dehan sensibilizasaun ne’e importante hodi membru sira halo prevensaun ba sira-nia aan hosi COVID-19 no bele hatene kona-ba tipu moras hada’et no moras la hada’et.

Moras la hada’et hanesan grupu kondisaun ida ne’ebé kobre moras cardiovascular, problema saúde mentál, diabetes mellitus, no króniku respiratória no moras seluk tan.

Ekipa Médiku PNTL rasik simu ona orientasaun hosi Komandante Jerál PNTL, Komisáriu Faustino da Costa, atu halo vizita ba munisípiu hodi fó konsulta  saúde obrigatóriu ba membru sira ne’ebé sofre moras.

Ba membru sira ne’ebé hasoru moras króniku, médiku PNTL koordena ho médiku Ospitál Nasionál Guido Valadares (HNGV) hodi hala’o tratamentu saúde.

“Programa ne’e ita halo hodi fó konsulta ba membru sira ne’ebé moras sira bele halo tratamentu saúde intensivu ba sira-nia aan fasilita hosi doutór espesialista sira iha Ospitál Guido Valadares Dili,” nia hateten.

Moras Ispa rejista aas

Durante tinan 2020, Klínika PNTL rejista pasiente membru PNTL sira ne’ebé sofre moras maioria ispa, hypertense, hepatitis no estómagu.

Komandu PNTL rasik kada tinan prevee hodi sosa ai-moruk no ekipamentu hodi fasilita médiku sira fó konsulta ba membru sira iha munisípiu 12, inklui Rejiaun Administrativu Espesiál Oe-cusse Ambeno (RAEOA).

PNTL mós servisu hamutuk ho Ministériu Saúde hodi fornese ai-moruk ba Klinika PNTL.

Iha fatin hanesan, Komandante Polísia Munisípiu Dili, Superintendente Xefe, Hendrique da Costa konsidera sensibilizasaun programa ne’e importante hodi fó atensaun ba membru sira kuidadu sira-nia saúde.

Komandu Dili mós husu atu ekipa médiku PNTL halo vizita no fó tratamentu saúde ba membru na’in-lima ne’ebé sofre moras no hela de’it iha uma.

Tuir planu, PNTL Dili sei hamutuk ho ekipa médiku jerál Klínika PNTL sei halo vizita ba Postu Administrativu Atauro hodi fó konsulta ba membru PNTL sira.

Iha tinan 2020, membru PNTL na’i- haat maka mate, tanba sofre moras no iha loron 23 janeiru 20201, Ajente Xefe Serafim Maia mate, tanba moras.

Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here