Komandante Jerál PNTL, Komísariu Faustino da Costa. Imajen Tatoli/Egas Cristovão

DILI, 04 fevereiru 2021 (TATOLI)- Komandante Jerál Polísia Nasionál Timor-Leste (PNTL) Komisáriu Faustino da Costa, dehan sira-nia parte kontinua koopera ho ekipa Diresaun Nasionál Terras no Propriedade (DNTP) hodi rezolve ejijénsia hosi komunidade uma-kain 11 iha Caicolu hodi muda sai.

Komisáriu Faustino dehan, parte PNTL halo mediasaun dala-tolu ona ho uma-kain 11 iha Caicoli atu simu apoiu osan ne’ebé Estadu sei oferese ba sira.

Notísia Relevante : Uma-kain 11 iha Caicoli hato’o rekomendasaun ba Governu ho PNTL

“Komandu ho ekipa integradu ba hamutuk ho komunidade sira informa ona ba família sira katak, ita fó tempu primeiru loron 30, depois hotu tiha ita fó tan tempu loron 30 agora hotu ona, agora fó tan tempu loron 10 ultima para sira atu koopera muda sai hosi fatin ne’ebá ka sira prontu atu simu apoiu ne’ebé hosi Estadu deside,” Komisáriu Faustino da Costa, hateten ba jornalista iha Palásiu Prezidensiál, Dili, kinta ne’e.

Kona-ba valór osan ne’ebé Estadu atu atribui ba família afetadu sira, Komisáriu Faustino dehan, asuntu ne’e parte Governu maka hatene, tanba PNTL presiza de’it rai atu halo konstrusaun ba futuru edifísiu PNTL.

“Husu ba komunidade sira koopera ba hodi hetan buat saida maka ita-boot sira sei hetan, para fó fatin ba konstrusaun ne’e la’o,” nia hateten.

Antes ne’e, Koordenadór Nasionál Rede ba Rai (RbR), Pedrito Viera no Reprezentante Advogadu Komunidade, Julio da Silva dehan, bainhira Governu seidauk fó kompensasaun ba komunidade, sira nia parte sei defende direitu vítima sira nian hodi lori kazu ne’e ba rezolve iha tribunál.

Komunidade sira rasik aprezenta ona sira nia ejijénsia ba Governu atu rezolve, maibé to’o agora parte DNTP seidauk fó resposta.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here