Governu halo vizita ba kontrusaun otél Hilton iha Fatuhada, kinta (04/02). Imajen TATOLI/Natalino Costa

DILI, 04 fevereiru 2021 (TATOLI)Ministru Koordenadór Asuntu Ekonómiku (MKAE), Joaquim Amaral, apresia inisiativa empreza timor-oan, Jackson Lay, ne’ebé halo investimentu ótel ho marka ho internasionál hanesan Hilton, ne’ebé hanesan parte ida atu promove setór turizmu iha Timor-Leste.

Investimentu ne’e ho kustu millaun $50 resin no iha futuru sei fó serbisu ba timor-oan barak.

La’ós fasil lori otél ho marka internasionál ba rai sira ne’ebé nia ekonomia seidauk forte, ida-ne’e hatudu sinál konfiansa no orgullu tanba setór privadu nasionál bele ona halo otél cinco estrela, ne’ebé bele konvense otél marka mundu hanesan Hilton,” Ministru Joquim dehan hafoin ramata halo vizita ba ótel Hilton iha Fatuhada, kinta ohin.

Tanba ne’e, governante ne’e husu timor-oan hotu tenke serbisu ba inisiativa ne’e.

“Ita orgullu tanba konsege hetan konfiansa ba ótel hanesan Hilton, harii iha ita-nia rai ida ne’e,  bele loke dalan atu atrai setór turizmu iha ita-nia rai,” nia akresenta.

Tuir Ministru, vizita ne’e hatudu Governu nia apoiu ba investimentu ne’ebé maka sira halo.

“Governu sei apoiu depende husi kazu pur kazu ne’ebé sei aprezenta,” nia hatutan.

Iha fatin hanesan, na’in ba Otél Hilton, Jackson Lay, apresia ho vizita membru Governu.

Obra ne’e rasik halo iha tinan 2014 ho objetivu ida hanesan timor-oan iha responsablidade atu promove setór turizmu.

“Serbisu ne’e atinje ona 65% no hein atu kompleta de’it buat balun atu konklui fizikamente, espera sei konklui iha fulan-neen nia laran,” dehan Jackson Lay.

Situasaun atuál halo traballadór fila ba sira-nia rai labele mai.

“Tuir loloos ami atu konklui hotu ona obra ne’e, maibé pandemia halo ami-nia traballadór sira iha hotu ona rai-li’ur, tanba ne’e kuandu voo ne’e reativa ami-nia ema sira bele filafali mai serbisu, espera bele konklui obra ne’e lalais,” nia tenik.

Nune’e mós, Diretór Ezekutivu Servisu Rejistu Verifikasaun Emprezariál (SERVE), Florêncio Sanches, nota katak investimentu ne’e di’ak tebes tanba Hilton ne’e marka internasionál.

“Ita-nia emprezáriu nasionál Hilton ne’e hatama nia pedidu ofisiál ba SERVE atu tau naran Hilton Timor-Leste,” nia dehan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here