Xefe Programa no Polítika Peskiza ba KNDL, José Coreia da Peidade. Imajen TATOLI/Joanico de Araújo.

DILI, 04 fevereiru 2021 (TATOLI)–Xefe Departamentu Programa no Polítika Peskiza, José Coreia da Piedade, klarifika komunidade maiória mak ladún komprende kona-bá labarik dalan ninin iha Timor-Leste tanba labarik sira iha dalan ninin ne’e utiliza hosi inan-aman no família sira.

Notísia Relevante: Iha Timor-Leste laiha “Labarik Dalan Ninin”

Nia hateten, labarik iha dalan ninin ne’e iha buat rua ne’ebé lahanesan. Ida, nia dehan, labarik servisu ho forsadu ne’ebé mak faan sasán no ida seluk mak labarik sira iha nia moris tomak iha de’it dalan ninin ka laiha uma no família.

“Ha’u hakarak hateten, ita Timor-Leste seidauk iha labarik ida mak halo nia moris tomak iha dalan ninin. Ita presiza halo separasaun entre labarik dalan ninin. Tanba, realidade labarik dalan ninin ne’e halo servisu ne’ebé mak haruka rasik hosi inan-aman sira,” José Coreia da Piedade hateten ba Agência TATOLI via telefónika, kinta ne’e.

Maibé, nia dehan, labarik ne’ebé mak halo servisu forsadu ida-ne’ebé mak ekonomikamente inan-aman ka família ruma mak haruka tanba nesesidade uma laran mak obriga.

Nia dehan, aleinde halo servisu ne’ebé família fó no ema seluk mak utiliza no halo esplorasaun ba labarik sira hodi faan sasán iha dalan ninin, ne’e la’ós tama iha kategoria labarik dalan ninin (anak jalanan).

“Ha’u hakarak klarifika katak iha Timor-Leste laiha labarik iha dalan ninin no labarik moris iha dalan ninin mós laiha. Ita Timor-Leste eziste kultura ne’ebé mak forte hodi kesi metin ita, nune’e labarik sira sempre iha família no iha uma rasik. Dala ita tan, ita laiha labarik dalan ninin,” nia esklarese.

Baibain, nia dehan, labarik sira iha dalan ninin ne’e iha maibé parte KNDL nia sempre relata ba parte relevante sira hanesan ajénsia ka Governu liuhosi Ministériu Solidaridade Sosiál no Inkluzaun (MSSI) hodi ajuda ka fó apoiu ruma ba sira.

Notísia Relevante: Labarik TL hela permanente iha dalan ninin seidauk iha

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here