Labarik na'in-rua tula malu ho bisikleta lori pisang goreng (hudi sona) hodi ba faan. Imajen Tatoli/Antonio Goncalves.

DILI, 04 fevereiru 2021 (TATOLI)—Responsável Uma Mahon Forum Komunikasaun Oratóriu Don Bosco Balide, Domingas Pereira, hateten durante ne’e ekipa Uma Mahon Balide halo observasaun iha terrenu katak labarik barak mak iha dalan ninin halo atividade negósiu nian hanesan faan sasán.

Notísia Relevante: Labarik TL hela permanente iha dalan ninin seidauk iha

Domingas Pereira hateten, atu dehan labarik iha dalan  ninin ne’e iha maibé labarik dalan ninin ne’e laiha tanba labarik sira pasa tempu iha dalan ninin hodi faan sasán maibé labarik sira nunka hela metin ka toba de’it iha dalan ninin.

“Labarik dalan ninin laiha tanba labarik sira sei fila ba uma bainhira tempu kalan ona. Tanba ne’e, ha’u hakarak dehan labarik sira ‘iha dalan ninin’ ne’e iha maibé ‘labarik dalan ninin (anak jalanan) ne’e laiha,” Domingas Perreira hatete ba Agência TATOLI ligasaun ho komemorasaun Loron Mundiál Ba Labarik Sira iha Dalan Ninin ne’ebé mundu tomak selebra kada loron 31 janeiru, iha nia knaar fatin, Balide, Dili, sesta ne’e.

Nia hatutan, tuir esperiénsia ne’ebé mak sira halo atendementu ba labarik sira katak loron tomak iha dalan no eskola mós sira la hanoin. Tanba, labarik sira ajuda sira-nia inan-aman hodi buka osan ba hakonu família nia nesesidade, entaun loron tomak nia laran ne’e, labarik sira tenke husik sira-nia direitu ba eskola hodi hamriik faan sasán iha dalan ninin.

Aleinde faan sasán, nia hatutan, iha labarik balun tenke hili lata no fase karreta hodi hetan lukru hosi atividade ne’e, no dalaruma labarik sira halo atividade ne’ebé mak ema boot sira baibain halo tanba nesesidade ekonómia família mak ejize.

“Iha kada kinta feira, ami-nia ekipa halo atividade observasaun ba iha terrenu para tau hatene loloos problema nia hun, tanbasá mak sira tenke iha dalan ninin. Bainhria mai hetan sira, ami sei la hapara direta sira maibé ami halo aprosimasaun no ko’alia ba labarik sira-nia inan-aman sira,” nia hateten.

Responsável ba Uma Mahon ne’e hateten, labele husu ba labarik sira tanbasá mak sira iha dalan ninin maibé presiza aprosima ba inan-aman sira tanba dala barak família mak sai hun ba problema hirak ne’e.

“Ami sempre aprosima inan-aman hodi hatene kronolojia hosi kazu ne’e rasik. Ho ida-ne’e, ha’u hakarak hatete pasadu nian kona-ba labarik fase karreta iha estrada. Ami sempre ko’alia ho sira maibé ikus mai ami fila-fali ba observa sira-nia atividade fase karreta ne’e. Ami aprosima ho inan-aman hodi halo akordu ho inan-aman sira atu fó fundu ba sira maibé fundu gratutita no ami lahusu nia funan. Maibé fó kritériu ba sira katak labele haruka tan labarik sira halo servisu ka faan sasán iha dalan ninin,” Domingas hateten.

Tuir nia, iha Forum Komunikasaun Oratório Balide mós iha programa rua ne’ebé oferese ba labarik vítima sira iha uma mahon refere liuhosi programa prevensaun no protesaun ba labarik sira.

“Maneira protesaun ba labarik sira, ita mak sai inan-aman ba sira. Tanba sira moris ho problema no menór idade hela maibé moris ho violénsia nia-laran. Violénsia ne’e kruel liu hanesan violénsia seksuál, insestu mak aman ho oan no avo ho beioan, no violénsia doméstika. Ami kuidadu sira hosi toba to’o hadeer no hadeer to’o toba fali. Inklui ba sira ne’ebé mak hakarak asesu ba eskola, ami fasilita no akompañia sira ba eskola,” nia informa.

Iha Uma Mahon ne’e, nia dehan, iha atividade balun ne’ebé Forum Komunikasaun Oratóriu oferese ba sira mak suku hena, aprende komputadór, língua no seluk tan.

Notísia Relevante: Limitasaun hosi ambiente ruma mak hamosu “Labarik Dalan Ninin”

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here