Primeiru-Ministru, Taur Matan Ruak. Imajen TATOLI/Egas Cristovão

DILI, 04 fevereiru 2021 (TATOLI)Primeiru-Ministru (PM), Taur Matan Ruak, informa iha semana oin ekipa interminsiteriál hahú aprezenta planu sosa ai-moruk vasinasaun AstraZeneca iha Konsellu Ministru (KM) atubele vasina sidadaun atu prevene COVID-19.

Komisaun interministeriál lidera husi Vise Primeiru-Ministru no Ministra Solidaridade Sosiál, Armanda Berta dos Santos, hodi halo preparasaun planu vasinasaun liuliu asesu ba ai-moruk AstraZeneca.

“Governu seidauk hasai desizaun ruma maibé provalvemente aprezentasaun sei realiza iha kuarta semana oin mai atubele hetan informasaun hodi ajuda Governu deside sosa vasina ne’e ba ita-nia rai,” PM Taur hateten, hafoin sorumutuk semanál ho Prezidente Repúblika, Francisco Guterres ‘Lú Olo’, iha Pálasiu Prezidensiál, Bairro Pité, kinta ne’e.

Notísia relevante: OMS-UE oferese millaun $2.4 ba vasinasaun no responde COVID-19

Xefe Governu afirma, daudaun ne’e preparativu husi komisaun interministeriál ne’e la’o di’ak no hein aprezentasaun ba reuniaun semana oin atebele foti desizaun ruma.

Entretantu, Governu seidauk deside montante orsamentu atu sosa-aimoruk AstraZeneca tanba sei rona aprezentasaun husi komisaun interminsiteriál.

PM Taur mós konfirma ona katak prontu atu sai ema ‘dahuluk’ hodi hetan vasinasaun.

Nune’e, Xefe Governu enkoraja sidadaun hotu atu simu vasinasaun atubele prevene-an ba COVID-19, tanba moras ne’e bele fó risku ba vida.

Ai-moruk vasina ne’e, empreza framaséutika AtraZeneca hahú inísia halo teste ba faze da-toluk ne’ebé iha kombinasaun anti-korpu monklonál ho esperansa uzu ba profilátiu atu prevene infesaun COVID—19 ne’ebé hetan risku.

Teste medikál internasionál ai-moruk ba faze da-toluk ne’e sei hahú avalia ninia seguransa no efikásia, ba anti-korpu ne’ebé koñesidu ho AZD7442.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here