Prezidente Komisaun C, Deputada Maria Angélica Rangel. Imajen TATOLI/Evaristo Soares Martins.

DILI, 04 fevereiru 2021 (TATOLI)–Komisaun C (Finansa Públika) hahú ona halo audiénsia públika ho instituisaun Estadu nian hodi halo apresiasaun ba Konta Jerál Estadu (KJE) 2019 nian.

Prezidente Komisaun C, Deputada Maria Angélica Rangel, ne’ebé lidera audisaun ne’e esplika bazea ba konstituisaun 95 alínea 3 (e) fó kbiit ba Parlamentu Nasionál fiskaliza orsamentu kada tinan.

Iha semana kotuk, Komisaun C halo audiénsia ho Câmara de Contas liuhosi Prezidente Tribunál Rekursu Deolindo dos Santos, hodi diskute KJE 2019 ne’e.

Nune’e mós horisehik audiénsia ho Ministériu Finansa no ohin ho Rejiaun Administrativa Espesiál Oé-Cusse Ambeno (RAEOA) no aban sei halo audisaun no Ministériu Saúde.

“Ami ko’alia kona-ba Konta Jerál Estadu nian, ne’ebé Câmara de Contas audita tiha ona iha 2019 nian. Funsaun hosi ami-nia fiskalizasaun polítika sei ba debate iha plenária maibé ami seidauk finaliza relatóriu no paresér,” Prezidente Komisaun C informa ba Agência TATOLI iha resintu Parlamentu Nasionál, kinta ne’e.

Bainhira Komisaun C finaliza relatóriu no paresér sei rekomenda auditoria hosi Câmara de Contas ba Governu.

“Iha loron 23 fevereiru sei debate ho Governu kona-ba Konta Jerál Estadu 2019 nian,” nia dehan.

Iha fatin hanesan, Adjunta Prezidente Autoridade RAEOA, Leonia Monteiro, relata ona relatóriu KJE 2019 RAEOA nian ba Komisaun C.

“Ami mai aprezenta ba Komisaun C tanba kada tinan tenke aprezenta relatóriu. Iha 2019 orssmentu ne’ebé aloka ba RAEOA hamutuk millaun $76,” nia dehan.

Nia hatutan, orsamentu montante refere destinada ona ba programa ne’ebé iha orsamentu. Nia fó-sai katak, iha tinan fiskál 2021, RAEOA sei integra ba sistema free and balance.

“Entaun Oé-Cusse iha orsamentu 2021, ema hotu bele asesu ninia ezekusaun iha portál transparénsia,” nia hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here