Vise-Ministru Administrasaun Estatal, Lino de Jesus Torezao. Imajen/Antonia Maia Gusmao.

DILI, 04 fevereiru 2021 (TATOLI)–Vise-Ministru Administrasaun Estatál (MAE), Lino de Jesus Torrezão, hateten ezame ba Prezidente Autoridade no Adminiatradór Munisípiu tolu iha transparánsia tanba MAE envolve parte hotu hodi partisipa iha ezame refere.

Notísia Relevante: Fevereiru, kandidatu administradór munisípiu lima sei tuir ezame

“Ita halo ezame transparánsia tanba laharee ba ema ida-ne’e no ida-ne’ebá. Ezame loke ba ema hotu,” Lino de Jesus Torrezão, hateten bainhira halo abertura ba ezame Prezidente Autoridade no Adminiatradór Munisípiu iha salaun VIP MAE, Colmera, Dili, kinta ne’e.

Vise-Ministru ne’e hateten, ba kandidatu sira-ne’ebé tuir konkursu ne’e tenke fuan boot hodi simu rezultadu ezame, tanba valór ezame sei bazea ba regra ne’ebé ekipa tékniku prepara ona.

“Bainhira la pasa, labele dehan ekipa tékniku mak la fó ita-boot sira pasa. Maibé, ita-boot sira-nia intelijénsia mak la permite hodi ita-boot sira la pasa ezame ne’e. Katak, ita-boot sira-nia intelijénsia seidauk to’o. Intelijénsia mak determina ita-boot sira-nia valór,” nia dehan.

Tanba, tuir Goverante ne’e hateten kandidatu ida mak hatán loos la to’o 50 mak sei la pasa tanba kada númeru ida iha valór 0,2 ho totál númeru ezame hamutuk 100 entaun presiza iha intelijénsia hodi hetan valór boot.

Nia hateten, ezame ba kandidatu Administradór no Prezidente Autoridade hamutuk na’in-20 ne’e kompostu hosi Liquiça na’in-lima (5), Ermera na’in-ualu (8) no Dili na’in-hitu (7) mak pasrtisipa iha ezame ne’e. 

Hosi kandidatu na’in-20 ne’e, nia informa, Dili iha kandidatu feto na’in rua (2), Ermera na’in-ida (1) no kandidatu mane hamutuk na’in-17.

Iha ezame Prezidente Autoridade no Administradór Munisípiu ne’e akompaña hosi ekipa Komisaun Funsaun Públika (KFP) iha na’in-rua (2) inklui ho KFP nian suplente ida hamutuk na’in-tolu (3)  no parte MAE nian iha na’in-tolu (3) ne’e na’in-rua (2) mak efetivu no ida suplente.

Entretantu, nia afirma, aban sei iha ezame ba kandidatu Prezidente Autoridade no Administradór Munisípiu hosi Munisípiu Manatuto no Bobonaro.

Jrnalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here