Logotipu UNTL.

DILI, 04 fevereiru 2021 (TATOLI)- Tribunál Distritál Dili (TDD), kinta ne’e, hala’o julgamentu ba arguidu ho inisiál VL nu’udar dosente ida iha Universidade Nasionál Timor Lorosa’e (UNTL) ne’ebé deskonfia komete kazu krime korrupsaun pasiva tanba husu ka koleta osan  hosi estudante ho montante $1,220.00 ba nia interese privadu.

Tuir faktu akuzasaun hosi Ministériu públiku (MP) katak, arguidu  VL hahú servisu nu’udar funsionáriu públiku iha Departamentu Ensinu Fízika, Fakuldade Edukasaun, Arte no  Umanidade iha UNTL dezde 2006 to’o  agora no iha tinan 2013, arguidu asume kargu nu’udar Vise-Diretór Ensinu Fízika, Fakuldade Edukasaun, Artes no Umanidade no iha tinan 2015 to’o marsu 2019, arguidu asume fali pozisaun nu’udar Diretór Ensinu Fízika, Fakuldade Edukasaun, Artes no Umanidade, no agora nu’udar Dosente iha nafatin departamentu refere iha UNTL.

Nitísia Relevante : Funsionáriu UNTL ida utiliza osan Estadu ba interese privadu

Nu’udar Diretór Ensinu Fízika, Fakuldade Edukasaun, Artes no Umanidade iha UNTL, arguidu nia knaar mak halo jestaun administrasaun iha departamentu refere, mak hanesan prepara oráriu semestrál, oráriu ezame proposal, ezame monografia, ezame final monografia, kontrolu atividade selesiona ba dosente sira, organiza enkontru, prepara dokumentu ba akreditasaun akadémiku departamentu nian, asina kartaun rezultadu estudu no  planeamentu estudante.

Iha semestre impar hahú hosi janeiru  to’o juñu 2019, arguidu mós hola parte nu’udar dosente orientadór ba estudante finalista sira ne’ebé mak tama iha arguidu ninia lista hamutuk na’in-70, maibé  realidade dala ruma iha d’eit estudante finalista entre ema na’in-10 to’o na’in-15 mak konsege hasoru arguidu hodi fó orientasaun ba sira oinsá atu hakerek proposta monografia to’o monografia ninia finalidade. Hosi estudante finalista nain-15 ne’e  hetan ona graduasaun.

Hanesan dosente orientadór ba monografia, dala ruma arguidu VL, konvida estudante finalista sira ne’ebé tama iha lista arguidu nian, liuhosi telefonema no liu hosi mensajen, hodi hasoru malu ho estudante sira ne’e, dala ruma iha kafeteira, dala ruma iha arguidu ninia gabinete no dala ruma hasoru malu iha arguidu ninia uma, hodi fó orientasaun ba estudante finalista sira ne’e.

Iha hasoru malu ne’e, arguidu sempre difikulta estudante sira, atu nune’e arguidu fasilmente husu osan ba estudante finalista sira  hosi montante mínimu $200.00 depende ba kapasidade kada estudante finalista sira.

Estudante sira ne’ebé iha kbiit bele selu tuir osan ne’ebé arguidu husu, atu nune’e sira  bele ba  ezame monografia hodi remata sira-nia estudu no ba estudante Sira ne’ebé iha kbiit natoon bele selu iha prestasaun to’o iha ezame monografia ne’e nia finalidade.

Arguidu husu osan ho montante ba estudante finalista hamutuk nain-hitu ho inisiál mak hanesan  ACD, BAP, AC, FRC, MS, MPA, DF, hamutuk $1,220.00 no osan sira ne’e estudante finalista sira entrega ba arguidu  tanba arguidu  nu’udar estudante finalista sira nia orientadór.

Osan sira ne’e arguidu husu no estudante sira balun  entrega ho montante la hanesan $300,00 $250,00 no balun $400,00 no osan sira ne’e estudante sira entrega ba arguidu   iha eskola,  iha arguidu nia rezidénsia inklui iha fatin ne’ebé arguidu kontaktu ho estudante sira hameno malu tiha ona.

Arguidu nu’udar diretór  Departamentu Ensinu Fízika, Fakuldade Edukasaun, Artes no Umanidade no mós nu’udar Dosente iha departamentu refere iha UNTL hatene katak tuir Regulamentu Akadémiku iha UNTL, ne’ebé regula iha Kapítulu I, art. 2″ n° 1 al. d). Kona-ba prinsípiu transparénsia finanseira, ne’ebé hatete proibidu sei hetan pena disiplinár ba ema ne’ebé selu no ba ema ne’ebé simu, ba kualkér pagamentu kustu ka taxa la’ós ofisial ba estudante.

Arguidu nu’udar edukadór no ema ne’ebé iha kapasidade intelektuál ho devér atu kuidadu naran di’ak, hodi asegura komportamentu ne’ebé di’ak, hodi garante prestíjiu no kredibilidade institusionál iha area edukasaun, maibé  kontráriu tanba  arguidu komete aktu sira hodi kontra ninia devér ho livre vontade rasik.

Ministériu Públiku akuza Arguidu nu’udar autór material ho forma konsumada ba krime korrupsaun pasiva ba aktu ilísitu, ne’ebé previstu  iha artigu 292 númeru  1 hosi Kódigu Penal.

Hatán ba akuzasaun hirak ne’e arguidu konfesa parsialmente ba Tribunal katak, faktu sira  loos hotu no momentu ne’ebá nia parte lahatene simu osan hosi estudante sira ida ne’e ida ne’e kontra lei tanba ne’e nia prontu devolve fila-fali.

Nia klarifika, osan ne’e estudante sira mak fó la’ós  nia mak husu ba estudante sira.

Sasin ho inisiál MP  konfesa, nia parte fó duni osan ba nia dosente orientadór  atu asese  ninia judul.

Hafoin rona tiha parte sira tama kedas ba iha alegasaun Ministériu Públiku mantein krime ne’ebé iha tanba faktu  provadu hotu no haree ba sirkunstánsia MP husu tribunál aplika pena prizaun tinan-tolu suspende ba tinan-lima.

Parte defeza husu tribunál atu aplika pena suspensaun tinan-rua ba arguidu tanba durante prosesu koopera ho justisa no arrepende hahalok.

Tribunál  adia  fila-fali julgamentu ba loron  19  fevereiru, tinan ne’e, iha tuku 9:30 hodi rona akórdaun final.

Prosesu julgamentu ne’e prezide hosi juis koletivu, Evangelinho Belo, Afonso Carmona, Ersilia de Jesus, Ministériu Públiku reprezenta husi prokuradór Rogério Viegas Vicente, arguidu hetan asisténsia legal hosi advogadu privadu Octavio Cardozo.

Jornalista   : Nelson de Sousa

Editór        : Francisco Simões

1 KOMENTÁRIU

  1. Nu’udar Alumni UNTL nian, pesoalmente, kondena hahalok sira hanensan ne’e. Ha’u-nia sujestaun maka, dosente hanesan ne’e tenke hasai tiha husi UNTL, tanba agora ema matenek barak.

HAKEREK NO HATÁN

Please enter your comment!
Please enter your name here