Ministru Obra Públika, Salvador Eugênio Soares dos Reis Pires. Imajen TATOLI/Egas Cristovão

DILI, 03 fevereiru 2021 (TATOLI)—Iha ámbitu implementa pra-kualifikasaun iha konkursu públiku obra Estadu, Ministru Obra Públika, Salvador Eugênio Soares dos Reis Pires, orienta ona ekipa atu hahú reativa sistema.

“Ha’u orienta ona ekipa Diresaun Nasionál Aprovizionamentu (DNA) hamutuk ho Gabinete Ministru Obra Públika (MOP) atubele reativa hikas sistema hodi empreza sira bele halo renovasaun sertifikadu invalidu (mate) no emite foun ba empreza sira ne’ebé seidauk iha klasifikasaun,” Ministru Salvador informa ba Agência TATOLI, iha Pálasiu Governu, kuarta ne’e.

Guia apoia ba inisiativa ne’e ho baze ba dekretu-lei númeru 27/2010, loron 22 dezembru, kona-ba sertifikasaun empreza privadu atubele ezekuta projetu Estadu nian.

Ho baze  lejizlasaun ne’e, MOP konsege kategoriza empreza sira hamutuk 700, ne’ebé husi númeru ne’e prodús ona sertifikadu klasifikasaun ba empreza hamutuk 697 iha área konstrusaun sivíl no empreza konsultoria téknika sívil ne’ebé kobre munisípiu 12 inklui Rejiaun Administrativu Espesiál Oé-Cusse Ambeno (RAEOA), maibé daudaun sertifikadu invalidu ona tanba ho durasaun tinan-rua de’it.

Daudaun  MOP-DNA inklui ajénsia sira esforsu nafatin halo adaptasaun ba vantajen no dezvantajen ne’ebé sei hasoru iha futuru bainhira implementa pra-kualifikasaun, nune’e empreza  sira labele sai vítima iha kompetisaun nia laran.

Ministru Obra Públika orienta ona DNA atu aselera prosesu pra-klasifikasaun tuir ezijénsia empreza sira  atubele kompete ho onestu tuir kada klasifikasaun.

“Ita husu atu DNA organiza daudaun prosesu sira ne’e hodi avansa ba asinatura entendimentu entre MOP no Kámara Komérsiu no Indústria Timor-Leste (CCI-TL) iha tempu badak,” nia akresenta.

Notísia relevante: MOP-CCI sei selebra akordu pra-kualifikasaun empreza konkorre konkursu públiku

Tanba ne’e, daudaun MOP, Komisaun Nasionál Aprovizionamentu (CNA, sigla portugés), inklui CCI-TL halo diskusaun molok halo entendimentu.

“Ha’u manda ona entedimentu ne’e ba Kámara Komérsiu no daudaun ne’e sira halo diskusaun hela ho Diresaun Nasionál Aprovizionamentu  kona-ba nia lala’ok tomak, ne’ebé iha tempu besik finaliza, ami asina kedan akordu atu hahú halo pra-kualifikasaun ba empreza sira,” nia hatutan.

MOP-DNA sei organiza entendimentu kona-ba pra-kualifikasaun empreza sira ne’ebé halo knaar iha área konstrusaun sivil, konsultória, eletrisidade no bee.

Durante tinan 2020, MOP halo esforsu tomak hodi halo manutensaun ba sistema pra-kualifikasaun ne’ebé paradu durante tinan barak nia-laran atu hafasil liután empreza sira submete dokumentu tuir rekerimentu.

Nune’e, MOP liuhosi DNA hahú halo klasifikasaun ba empreza sira iha área konstrusaun sivíl, iha espesialidade hanesan estrada, ponte, kotrola cheia, ba edifikasaun, bee no sanitasaun inklui  eletrisidade sei prodús sertifikadu ketak

Klasifikasaun dahuluk, empreza konstrusaun sivíl  fahe kategoria  hanesan, kategoria A ho númeru 59 empreza ne’ebé bele ezekuta projetu ho valór $ 1.500.000 ba leten. Kategoria B1 ho empreza 89 bele ezekuta projetu ho valór $ 750.000 to’o $1.500.000,3.

Kategoria B2 hamutuk empreza 181 ne’ebé bele ezekuta projetu ho valór $250.000 to’o $ 750.000 no kategoria C hamutuk empreza 284 ne’ebé bele ezekuta projetu ho valór $25.000 toó $ 250.000.

Ba kasifikasaun daruak, empreza sira iha área konsultória téknika fahe ba kategoria A ho empreza haat ne’ebé bele ezekuta projetu ho valór $1.500.000 ba leten, kategoria B1 empreza rua bele ezekuta ho valór $750.000 to’o $1.500.000.

Kategoria B2 ho empreza hitu ne’ebé bele ezekuta valór $250.000 to’o $750.000 no kategoria C laiha.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here