Koordenadór pilár hitu COVID-19, Ministériu Saúde no atuál Diretór Nasionál Serbisu Hospitalár no Emerjénsia HNGV, Nilton da Silva. Imajen/Egas Cristovão.

DILI, 03 fevereiru 2021 (TATOLI)—Ekipa pilár ida to’o sia hosi Komisaun Nasionál Prevensaun COVID-19, Ministériu Saúde (MS), dezloka ona ba munisípiu Bobonaro atu hametin liutan kooperasaun, liuliu liña koordenasaun entre autoridade munisipál ho ierarkia Dioseze Sagrado Coração de Jesus Maliana ba prevensaun COVID-19 iha fronteira.

”Ekipa ne’e lidera hosi Koordenadora Jerál Komisaun Nasionál Prevensaun COVID-19, Odete Viegas, atu halo reuñiaun ho parte Igreja, ekipa liña frente no autoridade munisipál hodi haforsa serbisu liña frente ba mitigasaun infiltrasaun ilegál iha fronteira,’’ Koordenadór pilár hitu, Nilton da Silva, hato’o liuhosi konferénsia imprensa iha salaun MS Caicoli, kuarta (03/02).

Notísia Relevante:Timoroan na’in rua pozitivu COVID-19, pasiente aumenta ba 24

Koordenadór pilár hitu ne’e esplika, durante estadia iha Maliana ekipa sei koordena ho autoridade munisipál sira ho ierarkia dioseze Maliana nian, atu kontinua ativu hodi fó kontribuisaun ba prevensaun moras ne’e  iha fronteira.

”Iha pontu balun ne’ebé ami atu fó, hanesan advokasia, komunika ho parseiru no Igreja liuliu husu tulun ba reliziozu sira atu reza ba ita-nia maluk sira ne’ebé iha hela kuarentena no sala izolamentu atu hetan saúde di’ak,’’ nia subliña.

Entretantu, kriasaun ekipa pilár ida to’o sia atu haree ba prevensaun surtu COVID-19 mak hanesan, ekipa pilár ida haree liu ba planeamentu, pilár rua haree ba komunikasaun risku,  pilár tolu haree ba vizilánsia epidemolojia, pilár haat  serbisu iha pontu entrada,  pilár lima iha Laboratóriu, pilár neen halo kontrolu infeksaun no prevensaun,  pilár hitu kona-ba jestaun kazu, pilár ualu apoiu serbisu lojístika no pilár sia ba serbisu esensiál sira.

Antes ne’e, ekipa ne’e koordena ona ho ierarkia Arkedioseze Metropolitana Dili no tuir planu iha semana oin sei kontinua hametin koordenasaun ho Diozese Baucau.

Notísia Relevante:MS sei involve Arkedioseze Dili iha prevensaun COVID-19

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here