Embaixadór Nova Zelándia iha Timor-Leste, Philip Hewitt. Imajen TATOLI/Evaristo Soares Martins

DILI, 03 fevereiru 2021 (TATOLI)–Prezidente Parlamentu Nasionál, Deputadu Aniceto Longuinhos Guterres Lopes, ho Embaixadór Nova Zelándia iha Timor-Leste, Philip Hewitt diskute kooperasaun membru parlamentu rai rua fahe esperiénsia atividade parlamentár nian ba malu.

“Enkontru ohin ko’alia kona-ba kooperasaun entre Parlamentu Nasionál Timor-Leste ho Nova Zelándia tanba situasaun pandemia COVID-19, ita bele buka meiu liuliu uza koneksaun internet nune’e membru parlamentu sira bele fahe esperiénsia no koñesimentu liuhosi teknolojia,” Embaixadór Philip Hewitt, informa ba jornalista sira iha Parlamentu Nasionál, kuarta ne’e.

Nia dehan, durante diskusaun ho Prezidente Parlsmentu Nasionál ko’alia mós kona-ba relasaun entre Governu Nova Zelándia ho Parlamentu Nasionál Timor-Leste nian liuliu aborda kooperasaun liga ba hasa’e koñesimentu rekursu umanu ba Parlamentu Nasionál Timor-Leste nian.

Tuir nia, iha 2015 embaixada fasilita programa interkámbiu ba iha Nova Zelándia maibé agora situasaun defísil tebes tanba pandemia COVID-19 entaun labele haruka ema sai ba li’ur maibé bele liuhosi teknolojia.

Embaixadór Philip ho Deputadu Aniceto Guterres ko’alia mós atividade parlamentár, ne’ebé liga ba grupu feto parlamentár no grupu foin sa’e parlamentár.

“Oinsá ita buka koneksaun internet hodi bele fahe sira-nia esperiénsia,” nia dehan.

Hewitt fó-sai katak, agora daudaun embaixada Nova Zelándia iha programa kursu língua inglés iha rai-laran ne’ebé fasilita funsionáriu públiku sira no bele mós envolve parlamentu iha kursu ida-ne’e. 

Nune’e mós Embaixada Nova Nova Zelándia ho Parlamentu Nasionál sei kontinua halo diskusaun iha futuru hodi identifika área posibilidade sira seluk.

“Bele mós hasa’e koñesimentu funsionáriu Parlamentu Nasionál nian iha área espesífiku, karik parlamentu presiza,” Embaixadór Philip Hewitt hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here