Membru PNTL observa movimentu karreta kontentór. Imajen Tatoli/Antonio Goncalves

DILI, 03 fevereiru 2021 (TATOLI)- Komandante Polísia Tránzitu Munisípiu Dili, Inspetór Domingos Sarmento Gama, informa sira-nia parte sei halo kontrolu másimu ba movimentu karreta kontentór atu labele viola despaxu konjunta númeru 6/MTC/MI/2020  Novembru kona-ba publikasaun sirkula kontrola transporte kontentór.

Despaxu ne’e hahú implementa ona iha loron 01 fevereiru 2021, hodi regula sirkulasaun karreta sira ne’ebé tula kontentór iha Dili tenke kumpre oráriu operasaun.

Notísia Relevante : Hahú 01 fevereiru, karreta kontentór halo operasaun bazeia ba oráriu

Oráriu operasaun karreta kontentór nian mak  hanesan hahú hosi dadeer tuku 07:00 to’o tuku 09:00 Otl, labele halo movimentu, iha meudia 12:00 to’o 14:00 labele halo movimentu no iha tuku 17:00 to’o tuku 21:00 Otl mós labele halo movimentu.

Nia dehan, ba oráriu ne’ebé fó sai ona, tuir lei artigu 10 kódigu estrada, bainhira motorista kontentór sira ne’e viola regra sei multa $75.00.

“Oráriu maka fó ona, to’o loron 4 fevereiru ba oin, se kompañia transporte sira-ne’e viola, sira sei selu multa tanba polísia sei halo kontrolu maka’as,” nia hateten.

Governu Timor-Leste fó sai despaxu konjunta ne’e ba PNTL ezekuta hodi regula movimentu transporte sira ne’e atu labele hamosu engarrafamentu iha tempu oras ne’ebé deside ona inklui atu redús asidente tráfegu.

“Ita regula movimentu sira ne’e atu redús engarrafamentu no asidente tráfegu, tanba maioria asidente grave ne’e envolve transporte sira ne’e,” nia hateten.

Parte Autoridade Portuária  Timor-Leste (APORTIL) no PNTL rasik sensibiliza ona regra ne’e ba Kompañia transporte sira hanesan, Work Transport, Rudal Transport, EDS, Everest Transport, Lea Transport, Timor Estivedores, Star King, Timor Food, Lisun Transport no seluk tan.

Jornalista   : Eugénio Pereira  

Editór        : Francisco Simões

HAKEREK NO HATÁN

Please enter your comment!
Please enter your name here