Komandante Jerál PNTL, Komísariu Faustino da Costa. Imajen Tatoli/Egas Cristovão

DILI, 03 fevereiru 2021 (TATOLI)-Komandu Polísia Nasionál Timor-Leste (PNTL) sensibiliza dekretu lei Nu. 44/2020 kona-ba regulamentu disiplinár foun PNTL nian ba ofisiál superiór no komandante munisípiu no unidade sira.

Portavós PNTL, Superintendente Xefe, Arnaldo de Araújo, informa sensibilizasaun dekretu lei ne’e halo direita hosi Komandante Jerál PNTL Komisáriu Faustino da Costa, hodi introdús ba komandante sira atu intende molok implementa iha terrenu.

Dekretu lei foun ne’e revizaun hosi dekretu lei Nu. 13/2004, 16 jullu 2004 ne’ebé iha mudansa ba prosedimentu balu ne’ebé importante tebes hodi bolu no sosializa lei ne’e.

Notísia Relevante : Komandu PNTL demite membru na’in-sia

Arnaldo hatutan, komandante presiza hatene prosedimentu no durasaun tempu ba prosesu no kompeténsia ne’ebé atribui ba komandante sira atu labele halo interpretasaun sala.

Dekretu lei ida ne’e mós fó prazu atu inisia prosesu to’o loron lima, kuandu entidade kompetente emite ona despaixu ba prosesu maka tenke ezekuta prosesu ne’e la’o ona no bainhira prosesu ne’e la la’o maka komandante ida ne’ebé hetan despaixu sei sujeitu fila- fali ba prosesu disiplinár.

Nia dehan, mudansa ne’ebé maka iha dekretu lei foun ne’e maka hanesan iha prosedimentu balun kestaun ba periodu tempu iha lei anteriór determina tempu  másimu loron-60 maibé dekretu lei foun ne’e loron-lima (5) de’it.

Pena ne’ebé iha lei anteriór define suspende membru ida to’o loron-240, Lei foun define pena másimu loron-180 de’it no bainhira gravidade infrasaun ne’e boot liu automatikamente rekomenda ba demisaun.

Iha parte kompeténsia atu foti desizaun atribui ba Komandante Munisípiu sira tanba Komandu munisípiu maka eziste seksaun justisa, iha lei anteriór komandante eskuadra sira mós iha kompeténsia hola medida disiplinár ba nia membru sira hodi fó suspensaun to’o loron-30.

Dekretu lei Nu. 44/2020, 7 de Outubru konsidera Rekursu Kontajiozu hosi membru ida hasoru desizaun Komandu hanesan sidadaun bai-bain.

Antes ne’e, Komisáriu Polísia, Faustino da Costa, husu atu komandante sira implementa lei ne’e ho loloos.

“Ha’u husu ba komandante sira atu kumpre no implementa loloos lei  no ho imparsiál la haree ba kolega ka família nune’e bele aplika pena ka sansaun tuir aktu ne’ebé nia komete,” Komisáriu Faustino da Costa afirma.

Jornalista   : Eugénio Pereira

Editór        : Francisco Simões 

HAKEREK NO HATÁN

Please enter your comment!
Please enter your name here