Polísia Tránzitu Munisípiu Dili sei aprezenta motorizada hamutuk 400-resin inklui karreta besik 10 ba Ministériu Públiku atu halo leilaun ba públiku. Imajen Tatoli/Eugénio Pereira

DILI, 03 fevereiru 2021 (TATOLI)- Komandante Polísia Tránzitu Munisípiu Dili, Inspetór Domingos Sarmento Gama, dehan sira-nia parte sei halo esforsu atu aprezenta sasán evidénsia ho motorizada hamutuk 400-resin inklui karreta besik 10 ba Ministériu Públiku hodi fó despaixu loke prosesu leilaun ba públiku.

Inspetór Domingos Sarmento Gama, rekoñese motorizada 400-resin ne’ebé hahú prende iha tinan 2002, 2006, 2012 to’o agora barak para sai aat hanesan fali besi tua ona, tanba na’in ba motorizada hirak ne’e lakohi ba halo prosesu, tanba motor barak tama kategoria asidente tráfegu ka soke no hamate ema.

Notísia Relevante : Janeiru, Tránzitu Dili kontribui $25,351.00 ba kofre Estadu

Tuir lei tránzitu Seksaun IV kona-ba tahan tiha veíkulu artigu 164 alínea G hateten, iha kazu ne’ebé hakerek tiha ona iha númeru ida uluk, sei la bele hatán veíkulu liu tiha loron 90, tanba la iha responsabilidade hosi veíkulu na’in atu halo tuir regra no nune’e, nia bele lakon tiha nia veíkulu hodi sai nu’udar sasán Estadu nian.

Nia hatutan, PNTL fasilita de’it lista transporte ne’e ba Ministériu Públiku nu’udar nain ba prosesu hodi husu Diresaun Nasionál Jestaun Patrimóniu Estadu (DNJP) ho Diresaun Nasionál Transporte Terrestre (DNTP) halo identifikasaun ba motorizada hodi loke prosesu leilaun.

“Agora sei iha motór 400-liu, ita hakarak lalais liu ka tarde tenke hamamuk tiha fatin ne’e, tanba malae sira mai dehan fatin ne’e ofisina ka kantor polísia, tanba motór para barak okupa fatin Inspetór Domingos Gama, hateten ba jornalista iha Komandu PNTL, Dili, kuarta ne’e.

Komandu Tránzitu Dili apela ba na’in motorizada sira ne’ebé hetan asidente atu ba trata ona sira-nia motór nia dokumentu hodi ba foti motór lori fila hodi bele fó espasu ba arredores PNTL nian.

Iha 2020, Komandu PNTL rasik aprezenta motór hamutuk 100, inklui karreta 17 ba Ministériu Públiku hodi entrega ba DNJP hodi halo leilaun.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here