Ministru Ensinu Superiór, Siénsia no Kultura, Longuinhos dos Santos. Imajen Tatoli/Egas Cristovão

DILI, 03 fevereiru 2021 (TATOLI)—Ministériu Ensinu Superior Siénsia no Kultura (MESSK) liuhosi ekipa tékniku, verifika hela dokumentu sira bazeia ba pedidu hosi Universidade Nasionál Timor Lorosa’e (UNTL) ne’ebé atu loke tan kursu Edukasaun Fízika Desportu (EFD) ho grau akadémiku lisensiatura.

“Ha’u simu ona pedidu hosi UNTL atu loke tan kursu EFD iha Fakuladade Edukasaun Arte no Humaniora (FEAH) nia okos ho grau lisensiatura. Ha’u orienta ona ekipa tékniku ba prosesu verifikasaun, liu-liu atu analiza dokumentu ba kursu foun ne’e,” MESSK, Longuinhos dos Santos, ba jornalista sira iha Palásiu Governu, kuarta (03/02).

Notísia Relevante:MESSK kontinua hein UNTL rejista EFD ho nível lisensiatura

Governante ne’e garante katak reitór foun UNTL, Francisco Soares Martins ne’ebé iha ona relasaun di’ak ho MESSK, sei fó atensaun ba kestaun ne’e atu bele hetan avaliasaun di’ak hosi Ajénsia Nasionál Avaliasaun Akreditasaun Akadémika (ANAAA).

“Bainhira UNTL iha ona planu hakarak loke kursu foun, tenki iha preparasaun másimu,” Longuinhos dos Santos subliña.

Ministru Longuinhos subliña ida ne’e tanba, eperiénsia avaliasaun ANAAA nian ba kursu 49 iha UNTL maioria hetan valór sufisiente.

Antes ne’e, ANAAA halo ona avaliasaun ba FEAH, maibé la konsege akredita tanba la prienxe kritéria sanulu (10) ne’ebé sai padraun ba estabelesimentu Instituisaun Ensinu Superior Públiku no Privadu (IESPP).

Kritéria sanulu ne’ebé ANAAA uza nu’udár padraun ba avaliasaun akreditasaun ne’e mak hanesan vizaun, misaun, metas no objetivu hosi kursu ne’e rasik atu nune’e bele aliña tuir papél  instituisaun nian no seluk tan.

Antes ne’e mós Diretor ezekutivu ANAAA, Edmundo Viegas, hateten fakuldade ne’e la konsege hetan akreditasaun tanba fallansu tékniku entre Fakuldade ho Sekretáriu Estadu Juventude no Desportu (SEJD).

Jornalista: Tomé Amado

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here