Ministru Administrasaun Estatál, Miguel Pereira de Carvalho. Imajen TATOLI/Egas Cristovão

DILI, 03 fevereiru 2021 (TATOLI)—Ministru Administrasaun Estatál (MAE), Miguel Pereira de Carvalho, informa daudaun prepara ona proposta revizaun ba lei númeru 11/2009, loron 07 outubru, kona-ba devizaun administrativa territóriu atu transforma suku Hatolia B, iha munisípiu Ermera ba postu administrativu.

“Ami halo hela proposta revizaun ba lei devizaun administrasaun territóriu tanba Governu hanoin atubele transfroma suku Hatolia B ba postu administrativu ida,” Ministru Miguel, hateten iha Palásiu Governu, kuarta ne’e.

Hatolia B hanesan suku ida iha juridisaun postu administrativu Hatolia A, munisípiu Ermera ho totál populasaun boot, ne’ebé iha tempu okupasaun Indonézia eziste Hatolia A no Hatolia B, maibé daudaun Hatolia A de’it mak sai postu adminsitrativu.

Governante ne’e haktuir, komunidade iha Hatolia B iha hanoin ona atu sira sai postu administrativu rasik tanba ein termu populasaun boot no jeográfika mós sira iha edifísiu liuliu  infraestrutura atu asesu ba postu Hatolia A.

Kretéria atu suku ida sai postu adminsitrativu maka presiza haree ba totál populasaun, área jeográfika, potensiál rekursu umanu, rekursu naturál iha área refere.

“Liuliu sidadaun sira asesu ba servisu Governu tanba ita estabelese estrutura barak, ne’e tanba ita la’ós ba tau administradór postu no funsionáriu sira iha ne’ebá de’it, maibé ita hakarak servisu ne’e besik liu ba povu atu iha prestasaun,” nia akresenta.

Suku Lore no Laivai iha faze estudu

Aleinde ne’e, Ministru Miguel informa, emipa téknika daudaun hahú halo estudu atu transfroma suku Lore I, Lore II no suku Laivai, iha munisípiu Lautém ba postu administrativu.

“Ami hahú iha faze estudu ba transformasaun suku Lore no suku Lavai ba postu adminsitrativu iha munisípiu Lautém,” Ministru tenik.

MAE finaliza estudu hafoin lori aprezenta iha reuniaun Konsellu Ministru atu hetan aprovasaun hafoin publika.

Suku Lore I no Lore II iha área juridisaun postu administrativu Lospalos, munisípiu Lautém, enkuantu suku Laivai, postu administrativu Lautém, iha munisípiu Lautém.

Daudaun Timor-Leste iha aldeia 2.233, suku 452, postu administrativu 65 no munisípiu 13.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here