Vice-Ministru Administrasaun Estatál, Lino de Jesus Torrezão. Imajen Tatoli/Antónia Maia Gusmão.

DILI, 03 janeiru 2021 (TATOLI)—Vise-Ministru Administrasaun Estatál (MAE), Lino de Jesus Torrezão, hateten MAE hahú halo sensibilizasaun kona-ba poder lokál ba autoridade munisipál, komunidade no ministériu sira iha munisípiu hotu tanba ministériu sira mós sei tama iha enkuadramentu legál 

“Ita halo sensibilizasaun poder lokál ba munisípiu sira atu fó koñesementu ba komunidade sira kona-ba saida mak poder lokál. Tanba bainhira ita hakat ba poder lokál ita tenke iha mós enkuadramentu legál ida hodi bele regula servisu sira hotu iha munisipál,” Lino de Jesus Torrezão hateten ba Agência TATOLI via telefónika, kuarta ne’e.

Nia informa, sensibilizasaun ba ba poder lokál ne’e, Governu liuhosi MAE hahú ona hala’o iha Munisípiu Manatuto iha loron 07 fulan janeiru tinan 2021, Aileu iha loron 19 fulan janeiru, no iha loron 02 fulan fevereiru tinan 2021 hala’o iha Ermera. 

Sensibilizasun ida-ne’e, nia hateten, la’ós de’it hala’o iha munisípiu sira maibé mós sei hala’o ba ministériu sira hotu.

“Ami disemina informasaun komesa hosi ministériu tolu mak hanesan Ministériu Edukasaun Juventude no Desportu (MEJD), Saúde no Ministériu Turizmu Komésiu no Indústria (MTCI),” nia hateten. 

Ministru ne’e hateten, razaun disemina informasuan kona-ba poder lokál ba ministériu sira ne’e tanba ministériu sira mós sei tama iha enkuadramentu legál relasiona ho kompenténsia ministériu sira-nian atu haruka ba munisípiu sira. 

Tanba, nia esplika, aban bainrua laiha ministériu nia emar ida iha munisípiu ne’ebé atu mai diretmente mai iha nasionál, tanba reprezentante Governu sentrál iha munisípiu mak Prezidente Autoridade no Administradór Munisípiu sira mak sei servisu hamutuk ho ministériu hotu-hotu iha munisípiu.

Nia esplika, tanba munisípiu no autoridade lokál sei regulariza ho dekretu-lei númeru 3/2016, depois halo alterasaun dekretu-lei númeru 3/2016 ne’e, altera ho dekretu-lei númeru 9/2019 ni ida-ne’e alterasaun ba dahuluk nian.

Membru Governu ne’e hatutan, alaterasaun daruak mak altera ho dekretu-lei númeru 54/2019, hodi fó dalan tuun ba iha munisípiu hotu-hotu atu sensibiliza para bainhira sira hala’o ona atividade ne’ebé mak relasiona ho sira-nia funsaun, ne’e tenke iha enkuadramentu legál ida hodi orienta sira para hala’o servisu iha munisipál sira.

Governante ne’e haktuir, sensibilizasuan ida-ne’e presiza halo tanba atu lori besik administrasaun públika ba komunidade no autoridade sira atu oinsa hala’o knaar iha munsipál sira.

“Ho ne’e, ita bele dada atendementu ba ita-nia komunidade sira, nune’e sira mós bele simu atendementu lalais. Ida-ne’e hanesan benfisíu ida ba ita tanba hakbesik administrasaun públika ba komunidade sira,” nia dehan.

Iha sensibilizasaun ne’e, nia dehan, MAE halo ona sensibilizasaun iha Munisípiu Aileu, Manatuto no Ermera no munisípiu seluk sei hein tanba programa iha nasionál mós barak.

Entretantu Ministru Administrasaun Estatál (MAE), Miguel Pereira de Carvalho, hateten sensibilizasaun ho autoridade sira iha Ermera ne’e atu observa besik liu servisu ne’ebé atinji ona no atividade dezmpeñu ba 2020 nian ho indikadór no planu desempeñu 2021.

“Sensibilizasaun iha Ermera ne’e atu transmite ba komunidade sira kona-ba funsionamentu loloos administrasaun lokál Estadu nian, tuir estréjia ne’ebé mak Guvernu aprova ona hodi implementa deskonsenrtrasaun administrativa territóriu Timor-Leste,” Miguel Pereira de Carvalho hateten liuhosi komunikadu imprensa hafoin haalo sensibilizasaun iha Eremera, tersa ne’e.

Nia dehan, ohin loron Guvernu sentrál deskonsentra ona servisu sira barak tebes ba munisípiu importante ba diretór munisípiu, autoridade munisipál atu komprende didi’ak kona-ba lala’ok funisionamentu administrasaun lokál Esatdu ne’e nian rasik.

Nia hateten, diretór munisípiu hotu-hotu ierarkiamente depende ba administradór munisípiu nian hanesan reprezenta Governo sentrál hosi munisípiu.

“Autoridade sira tenke hatene baze legál ba sira, bainhira hala’o servisu hanesan transparánsia prinsípiu justisa nian, igualidade, no prinsipiu bázika ba boa governsaun ne’ebé maka ita hakarak implementa iha munisípiu,” nia dehan.

Ministru ne’e husu ba Autoridade Lokál Ermera nian tenke ezekuta orsamentu 2021 nian ho di’ak tanba tinan ida ne’e Governu sentrál aloka osan barak liután, ba iha munisípiu sira hodi hahú halo ona planu ba atividade orsamentu 2022 nian.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here