Ministru Obra Públika, Salvador Eugênio Soares dos Reis Pires. Imajen TATOLI/Egas Cristovão

DILI, 03 fevereiru 2021 (TATOLI)Ministru Obra Públika, Salvador Eugênio Soares dos Reis Pires, klarifika daudaun iha jeradór haat ne’ebé la funsiona iha munisípiu Ainaro, tanba munisípiu hotu uza ona sistema sentrál elétrika.

Ministru hato’o kestaun ne’e hodi responde ba preokupasaun Komisaun E ne’ebé trata asuntu infraestrutura, ne’ebé deteta jeradór haat la funsiona iha munisípiu Ainaro.

“Jeradór haat ne’e uluk ita uza iha Ainaro, sub-estasaun Eletridade de Timor-Leste, Empreza Públika (EDTL,E.P) Cassa, maibé agora la funsiona ona tanba iha ona sistema sentrál elétrika rua ne’ebé funsiona hanesan Betano no Hera,” Ministru Salvador informa ba Agência TATOLI, iha Pálasiu Governu, kuarta ne’e.

Notísia relevante: Komisaun E deteta jeradór 4 iha Ainaro la funsiona

Tanba ne’e, governante ne’e dehan, propritáriu  ne’e kabe ona ba polítika EDTL atu halo manutesaun, leilaun ka distribui ba fatin seluk tanba ita la uza ona jeradór sira,” nia akresenta.

Tuir Ministru, sub-estasaun iha área ne’e uza ona sistema transmisaun iha distribuisaun enérjia elétrika ba komunidade iha munisípiu Ainaro no enerjia nia huun mai husi sentru EDTL Betano.

Ministériu Obra Públika (MOP) liuhosi EDTL identifika ona daudaun ne’e iha suku hamutuk 77 iha territóriu tomak maka seidauk asesu ba eletrisidade durante tinan barak nia-laran.

Nune’e, tau ona planu prioridade atu tinan ne’e implementa pakote 33 iha faze dahuluk.

Pakote eletrisidade ne’ebé sei implementa ne’e kuaze iha munisípiu hotu ho ninia prioridade bazeia ba suku ne’ebé besik liu ona liña infraestutura ezistente, atu nune’e bele diretamente halo konesaun ba enerjia eletrisidade.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here