Vise Prezidente Asuntu Gabinete Formasaun Professional, INFORDEPE, Arlindo Pinto. Imajen/TATOLI

DILI, 03 fevereiru 2021 (TATOLI)— Instituto Nacional de Formação de Docentes e Profissionais da Educação de Timor-Leste (INFORDEPE) sei oferese formasaun espesífiku ba profesór permanente na’in 3.000-resin, iha tinan ne’e.

“Tinan ne’e ita sei realiza formasaun espesífiku ba ita-nia profesór permanente na’in 3.000-resin ne’ebé mak nunka hetan oportunidade atu tuir formasaun. Ita sei realiza formasaun tuir área espesífiku ida-idak nian, hahú hosi pré-eskolár to’o ensinu sekundáriu jerál no ensinu sekundáriu tékniku vokasionál,” Vise Prezidente Gabinete Asuntu Formasaun Profisionál INFORDEPE, Arlindo Pinto, ba jornalista Agência Tatoli iha serbisu fatin Matadouru, kuarta (03/02).

Notísia Relevante:INFORDEPE prodúz ona kurríkulu ba formadór

Hosi nível pré-eskolár, nia hatutan, totál profesór ne’ebé sei tuir formasaun hamutuk na’in 626 ho konteúdu tolu mak hanesan, formasaun  kona-bá dezenvolvimentu labarik nian, formasaun ba profesór profisionál inklui kapasidade no maneira atu halo animasaun ba labarik (playground).

Formasaun ba profesór ensinu báziku na’in 2.637 sei hetan matéria espesífiku hanesan konteúdu kurrikulár, disiplina jerál, matemátika inklui arte no kultura.

“Profesór primeiru no segundu síklu sei hetan matéria matemátika no siénsia naturál. Profesór ensinu báziku terseiru síklu sei hetan formasaun kona-bá konteúdu kurrikulár, inklui arte kultura no múzika,” nia haktuir.

Kona-bá nível ensinu sekundáriu jerál nian, Arlindo Pinto esplika, konteúdu sei foka liu bá formasaun sosiolojia, sidadania no dezenvolvimentu sosiál ho totál profesór ne’ebé partisipa hamutuk na’in 258, nune’e mós profesór hosi eskola tékniku vokasionál na’in 75 sei hetan formasaun iha área disiplina produtivu.

Tuir planu, formasaun ne’e sei realiza iha fulan maiu ba oin ho konteúdu formasaun prezensiál no formasaun online.

“Ba profesór sira iha área fronteira terrestre sei hetan de’it formasaun online, tanba INFORDEPE tenki asegura no prevene COVID-19, inklui kumpre regra sira protokolu saúde,” nia subliña.

Orsamentu ba formasaun iha tinan ne’e, INFORDEPE prevee rihun $355, kompara ho tinan kotuk institutu ne’e uza millaun $1,2.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here