Eis Ministru Administrasaun Estatál, Arcangelo de Jesus Gouveia Leite. Imajen/Espesiál

DILI, 03  fevereiru 2021 (TATOLI)-Eis Ministru Administrasaun Estatál (MAE), Arcangelo de Jesus Gouveia Leite, hamutuk ho funsionáriu aprovizionamentu (MAE) ho Diretór kompañia privadu na’in-neen (6) sai arguidu  iha Tribunál Distritál Dili (TDD).

Juiza titulár, Ercila de Jesus, hateten prosesu ne’e loloos, kuarta ne’e, hala’o julgamentu, maibé arguidu ida la marka tanba tuir regra prosesuál ba sesaun audiénsia atu la’o  presiza prezensa arguidu sira hotu nian.

Juiza Ercila afirma, prosesu ne’e notifikadu ona arguidu, maibé arguidu la marka prezensa tanba ne’e arguidu tenke halo justifikasaun dentru loron lima ba Tribunál. Bainhira la justifika mak sei hetan multa $20.00 inklui hasai mandadu detensaun.

“Ho nune’e Tribunál  adia fila-fali julgamentu ba iha loron 10 fevereiru ne’e, iha tuku 9:00 dadeer,” Juiza Ercila de Jesus pronunsia iha sala audiénsia TDD.

Nia hateten, prosesu ne’e parte sira nia estatutu nu’udar arguidu tanba ne’e husu atu kolabora atu labele prejudika prosesu  hodi bele aselera nune’e deside se mak loos ka sala  tanba daudaun arguidu sira sei inosente.

Defeza, José Camões, ne’ebé fó asisténsia legál ba arguidu Arcangelo Leite, hakarak Tribunál aselera lalais prosesu refere tanba kazu ne’e akontese dezde 2010.

Tuir informasaun ne’ebé Agência TATOLI asesu katak prosesu kazu ne’e rejista ho númeru Nuc 1052/12.PDDIL, iha indísiu infrasaun   relasiona ho projetu iha Ministériu Administrasaun Estatál (MAE) nian ba konstrusaun edifísiu administrasaun munisipál iha 2010.

Ministériu Públiku (MP) akuza arguidu sira ho krime partisipasaun ekonomia no negósiu  previstu iha artigu 299 ho agravasaun tuir artigu 301, krime administrasaun da noza previstu iha artigu 274, burla agravadu previstu iha artigu 267 hotu-hotu iha iha kódigu penál.

Kona-ba faktu akuzasaun kompletu Tribunál seidauk lee sai tanba seidauk hahú sesaun audiénsia ne’ebé sei iha  segredu justisa .

Audiénsia julgamentu ne’e Ministériu Públiku reprezenta hosi Prokuradora Lidia Soares no arguidu ka arguida  sira hetan asisténsia legál hosi advogadu privadu José Camões no advogada Virna Carvalho ho advogadu na’in-haat seluk tan.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here