Embaixadór Japaun iha Timor-Leste, Kinufuchi Masami. Imajen TATOLI/ Evaristo Soares Martins.

DILI, 03 fevereiru 2021 (TATOLI)–Embaixadór Japaun iha Timor-Leste, Kinufuchi Massami, hateten pandemia COVID-19 impede prosesu konstrusaun aeroportu internasionál Nicolau Lobato, Dili.

Notísia Relevante: Governu Hahú Esforsu Konstroe Aeroportu Comoro iha Inísiu 2021

Embaixadór Masami haktuir, relasiona ho asisténsia ne’ebé mak Governu Japaun fornese, relativamente ho apoia ida atu konstrui aeroportu internasionál Nicolau Lobato ne’e ninia prosesu avansu tebes.

“Atu dehan de’it katak tinan kotuk Primeiru Ministru haruka halo revizaun ba proposta ida hodi halo alterasaun no hosi parte Japaun nian konkorda tiha ona ajustamentu ida-ne’e, COVID-19 mak atrazu maibé prosesu hotu atu finaliza ona,” nia informa ba jornalista sira hafoin hasoru malu ho Prezidente Parlamentu Nasionál, Aniceto Longuinhos Guterres Lopes, iha PN, kuarta ne’e.

Nia dehan, seidauk iha desizaun kona-ba montante orsamentu ba aeroportu refere.

Iha opurtunidade ne’e mós, Embaixadór Kinufuchi atualiza informasaun atuál kona-ba prosesu realibilitasaun ne’e ba Prezidente Parlamentu Nasionál.

Antes ne’e, Ministru Transporte no Komunikasaun José Agustino da Silva, hateten orsamentu ba konstrusaun ne’e liuhosi empréstimu Banku Dezenvolvimentu Aziátiku (ADB-sigla inglés) ho montante millaun $100 no governu aloka millaun $30, hamutuk millaun $130. Maske nune’e konstrusaun aeroportu refere sei presiza millaun $480.

Ministru José Agustinho ko’alia ona ho embaixadór Japaun atu apoia tán millaun $44.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here