treinamentu jestaun ambientál. Imajen/Conservation International

DILI, 03 fevereiru 2021 (TATOLI)-Conservation International hamutuk ho Centro Nacional de Emprego e Formação Professional (CNEFP) Tibar, fó formasaun edukasaun jestaun ambientál ba joven na’in-100 atu iha koñesimentu ba importánsia natureza hodi garante bein-estar povu.

“Edukasaun ambientál ida-ne’e sei fahe koñesimentu, fó motivasaun, no presiza envolvimentu direta atu maneja Timor-Leste ninia rekursu sira. Ho envolvimentu joven, ita enkoraja sira atubele iha konesaun di’ak no iha responsabilidade mantein kualidade ambiente agora no ba futuru,” Diretór País Conservation International Timor-Leste, Manuel Mendes, hateten liuhosi nota ne’ebé Agência TATOLI asesu, tersa ne’e.

Tuir planu, programa ne’e sei oferese treinamentu ba joven hamutuk 100 iha suku 10, ne’ebé tapa dahuluk sei hala’o iha CNEFP Tibar ba suku haat hanesan, Fahilebo, Leorema, Lihu, no Ulmera.

Iha fulan tuir mai, sei fornese tan ba grupu joven husi parte Irabere, ne’ebé kompostu husi suku neen hanesan Uacala, Baricafa, Larisula, Bahatata, Irabin de Cima no Cainliu.

Objetivu treinamentu ne’e, atu hasa’e koñesimentu no esperénsia partisipante iha jestaun rekursu naturál no sei hasa’e koñesimentu iha área ortikultura liuhosi konseitu teoria no prátika ba jestaun rekursu naturál no tékniku konservasaun.

“Nune’e, bele dezenvolve sira-nia kapasidade kona-ba jestaun rekursu naturál no hametin kompromisu atu tau importánsia ba degradasaun rai iha kaptasaun importante sira ne’ebé hela bá,” akresenta Diretór ne’e.

Conservation International haree iha vantajen di’ak ba treinamentu ne’e tanba joven sira mak futuru nasaun atu kontinua lidera jestaun ambientál sustentável iha Timor-Leste.

“Treinamentu ne’e sei enkoraja joven sira atubele fahe tutan saida mak sira aprende ona ba sira-nia maluk iha komunidade, nune’e sira bele influensia mós sira seluk,” nia tenik.

Sorin seluk, Vise-Ministru Agrikultura no Peska, Abílio Xavier de Araujo, nota preokupasaun Conservation International no identifika durante ne’e menus koñesimentu atu jere rekursu naturál, liuliu treinamentu atu hasa’e koñesimentu no abilidade foin-sa’e sira.

Nune’e mós, Sektetáriu Estadu Formasaun Profisionál no Empregu, Alarico do Rosário, kontinua fó apoiu ba sentru treinamentu sira iha Timór laran tomak, liuliu Sentru Formasaun Tibar atubele kapasita joven sira iha área oin-oin, inklui jestaun ambientál sustentável hodi proteje ambiente no natureza sira nu’udár rikusoin rai ida ne’e nian.

Programa ne’e sei foka ba apoiu melloramentu sistema jestaun rekursu naturál bazea ba komunidade iha koridor basia idrográfika prioritáriu, ne’ebé hanesan área ne’ebé identifika ona ba kaptasaun bee moos.

Atividade ne’e hanesan programa balun ne’ebé finansia fundu projetu Global Environment Facility (GEF) ho ninia títulu ‘asegura konservasaun Timor-Leste nia serbisu biodiversidade no ekosistema longu prazu liuhosi estabelesimentu funsionamentu ida iha sistema área protejida nasionál no hadi’a jestaun rekursu naturál iha koridor prioritáriu basia idrográfika (TLSNAP)’, ne’ebé implementa husi Conservation International.

Projetu ne’e foka liu ba estabelesimentu Timor-Leste nia sistema área protejida no hadi’a jestaun ekosistema no floresta iha koridor basia idrográfika prioritáriu.

Conservation International serbisu hamutuk ho Sekrataria Estadu Formasaun  Profissionál no Empregu (SEFOPE) inklui Institutu Nasionál Dezenvolvimentu Mão de Obra (INDMO) nu’udár parseiru nasional projetu ne’e, hodi halo validasaun ba programa treinamentu joven ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here